საქართველოს უნდა მიეცეს ძალიან მკაფიო გზა, საგზაო რუკა იმისათვის რომ ჩვენ ალიანსში გავწევრიანდეთ, – ამის შესახებ გიორგი ხელაშვილმა განაცხადა. პარლამენტის საგარეო ურთიერთობათა კომიტეტის თავმჯდომარის პირველმა მოადგილემ ნატოს მადრიდის სამიტზე საქართველოს პოზიციაზე ისაუბრა.
„ჩვენი პოზიცია ნატოს მადრიდის სამიტზე იქნება უპირველესად პოლიტიკური გადაწყვეტილების მიღება ნატოს მხრიდან. ეს არის ჩვენი სათხოვარი პოზიცია ყველა დელეგაციასთან ნატოს ცენტრალურ სტრუქტურებში. საქართველოს უნდა მიეცეს ძალიან მკაფიო გზა, საგზაო რუკა იმისათვის რომ ჩვენ ალიანსში გავწევრიანდეთ. ახლა ნებისმიერი უკან დახევა, ნებისმიერი ყოყმანი საქართველოსთან დაკავშირებით შეიძლება არასწორად იყოს გაგებული რუსეთის მიერ, რაც არასასურველია არამარტო საქართველოსთვის, არამედ მთელი ევროატლანტიკური უსაფრთხოებისთვის“, – განაცხადა ხელაშვილმა.
ლიეტუვაში, ნატოს საპარლამენტო ასამბლეაზე კანონმდებლები რუსეთის აგრესიულ ქმედებებზე, უკრაინაში მიმდინარე ომზე და პარტნიორების დახმარებაზე მსჯელობენ. ვილნიუსში იმყოფება საქართველოს საპარლამენტო დელეგაცია.