IMG.GE IMG.GE

შვედეთის მთავრობა კორონავირუსთან ბრძოლის „შვედურ მოდელს“ გამოიძიებს. ინფორმაციას ამის შესახებ გამოცემა Bloomberg-ი ავრცელებს.

მსოფლიოს ქვეყნების უმეტესობისგან განსხვავებით, სადაც პანდემიის გამო მკაცრი შეზღუდვები დაწესდა, შვედეთმა ვირუსთან ბრძოლის უფრო მსუბუქი რეჟიმი აირჩია. ქვეყანაში აკრძალვები არ დაწესებულა, სოციალური დისტანცირება და თვითიზოლაცია კი ნებაყოფლობით ხასიათს ატარებდა. ჯონს ჰოპკინსის უნივერსიტეტის მონაცემებით, ამან შვედეთში, მეზობელ ქვეყნებთან შედარებით სიკვდილიანობის უფრო მაღალი დონე გამოიწვია.

კომისია, რომელსაც უზენაესი ადმინისტრაციული სასამართლოს ყოფილი თავმჯდომარე მატს მელინი ხელმძღვანელობს, შეაფასებს მთავრობისა და ადგილობრივი ხელისუფლებების მიერ მიღებულ ზომებს და მათ სხვა ქვეყნებში გადადგმულ ნაბიჯებს შეადარებს. საბოლოო დასკვნა კომისიამ 2022 წლის თებერვალში უნდა წარადგინოს.

შვედეთის მთავარი ეპიდემიოლოგი ანდერს ტეგნელი ხელისუფლების მიერ არჩეულ მეთოდს იცავს და აცხადებს, რომ საზოგადოების გახსნა და დისტანცირების წესების სწავლება ხანგრძლივ პერსპექტივაში პანდემიასთან ბრძოლის ერთადერთი რეალური საშუალებაა. მისივე განცხადებით, მკაცრი ზომებით ვირუსის დროებით შეკავებაა შესაძლებელი, მაგრამ ის აუცილებლად დაბრუნდება.

ბოლო მონაცემებით, ქვეყანაში კორონავირუსის 68 451 შემთხვევაა დადასტურებული, 5370 ადამიანი გარდაიცვალა.

კომენტარის დატოვება
IMG.GE
გაზიარება