მრავალთვიანი დისკუსიის შემდეგ, ევროკავშირის წევრმა ქვეყნებმა რუსეთის წინააღმდეგ მიმართული სანქციების მე-14 პაკეტი ვერ მიიღეს. ეს გერმანიის ქმედებების გამო მოხდა, რომელიც პროცესის გაჭიანურებას აგრძელებს.
ამის შესახებ „როიტერი“ ევროპულ დიპლომატიურ წრეებზე დაყრდნობით იტყობინება.
მე-14 პაკეტის შემაკავებელი ზომები მოიცავდა რუსული თხევადი ბუნებრივი აირის გადაზიდვის აკრძალვას და ევროპელი ოპერატორებისთვის პასუხისმგებლობის ზომების დაკისრებას მესამე ქვეყნებში მათი შვილობილი კომპანიებისა და პარტნიორების მიერ სანქციების დარღვევისთვის.
„როიტერის“ წყაროების თქმით, პუნქტი ევროპელი ოპერატორების პასუხისმგებლობის შესახებ საბოლოო დოკუმენტიდან გერმანიის კრიტიკის შემდეგ ამოიღეს.
ეს პუნქტი ექსპორტიორებს ავალდებულებს, პასუხისმგებელნი იყვნენ თავიანთი პარტნიორების ქმედებებზე მესამე ქვეყნებში, რომელთა კონტროლი ევროკავშირის კომპანიებს უჭირთ.