დღეს დაიწყო საქართველოს პრემიერ-მინისტრის სამდღიანი სამუშაო ვიზიტი შვეიცარიაში, დავოსში. რა თქმა უნდა, ვიზიტის შინაარსობრივი ნაწილი, ერთის მხრივ, ეკონომიკური კომპონენტია, ხოლო მეორე ნაწილი პოლიტიკურია, – ამის შესახებ საქართველოს საგარეო საქმეთა მინისტრმა ილია დარჩიაშვილმა დავოსში, ჟურნალისტებთან საუბრისას განაცხადა.
მისი თქმით, ეკონომიკურ ნაწილში დღეს საქართველოს პრემიერ-მინისტრს პირველი შეხვედრა ჰქონდა საერთაშორისო სავალუტო ფონდის მმართველ დირექტორთან და საკითხი ძირითადად შეეხებოდა, პოსტ-პანდემიურ პერიოდს, საქართველოს ეკონომიკის გაძლიერების შესაძლებლობების გამონახვას.
„ძალიან საინტერესო შეხვედრა გამოვიდა. ასევე, პრემიერ-მინისტრს ექნება შეხვედრები სხვადასხვა მსხვილი კომპანიის წარმომადგენლებთან. მათთან ერთად განიხილება ის შესაძლებლობები, რომლებსაც ჩვენი ქვეყანა სთავაზობს უცხოურ კომპანიებს. პოლიტიკურ ნაწილში, პრემიერს ექნება შეხვედრები სხვადასხვა ევროპელ ლიდერთან, განხილული იქნება საქართველოს ევროპული პერსპექტივა და ის საკითხები, რომლებიც ეხება საქართველოს კითხვარის შევსებას და ჩვენს მომავალ ევროპულ ინტეგრაციას“, – განაცხადა საგარეო საქმეთა მინისტრმა.
დავოსის მსოფლიო ეკონომიკური ფორუმი ოფიციალურად გაიხსნა. დავოსში შეხვედრებს მართვას საქართველოს დელეგაცია, რომლესაც პრემიერი ხელმძღვანელობს.