საპარლამენტო უმრავლესობის წევრი, დავით მათიკაშვილი აცხადებს, რომ ქვეყნისადმი მტრულად განწყობილი ძალები თავისას ვერ მიაღწევენ და საქართველო ევროინტეგრაციის გზაზე სვლას გააგრძელებს.
„რასაც არ უნდა აკეთებდნენ, რამდენიც არ უნდა იარონ ბნელ დერეფნებში და როგორც არ უნდა ეცადონ საქართველოს დისკრედიტაციას, რათა ქვეყანამ ვერ მიიღოს ის სტატუსი, რომელიც ისტორიულადაც და დემოკრატიული განვითარების კუთხითაც, ცხადია, საქართველოს ეკუთვნის, ქვეყნისადმი მტრულად განწყობილი შიდა ძალები თავისას ვერ მიაღწევენ“, – აცხადებს დავით მათიკაშვილი.
მაშინ, როცა ქვეყანა ევროკომისიის დასკვნის მოლოდინშია, მმართველი გუნდის შეფასებით, ოპოზიცია საერთაშორისო ასპარეზზე ქვეყნის ინტერესებს შეგნებულად აზიანებს. მაგალითისთვის, ოპოზიციის ნაწილს გასულ კვირაში შეხვედრები ბრიუსელში, ბერლინსა და ტალინში ჰქონდათ. გავრცელდა ლობისტებთან შეხვედრის ფოტოებიც. რადიკალური ოპოზიცია ირწმუნებოდა, რომ მათ ქვეყნის მხარდასაჭერად იმუშავეს. მათთან შეხვედრის შემდეგ, ევროპარლამენტარებმა მწვავე განცხადებები გააკეთეს.