„ირაკლი კობახიძის ამ წერილში ნამდვილად იგრძნობოდა ის გულწრფელობა, რითაც ის მიმართავს საზოგადოების ყველა წევრს – ყველა ასაკის წარმომადგენელს და განსაკუთრებით, ახალგაზრდებს“, – ასე გამოეხმაურა „ხალხის ძალის“ აღმასრულებელი მდივანი, დეპუტატი გურამ მაჭარაშვილი პრემიერ-მინისტრის ღია წერილს, სადაც ირაკლი კობახიძე საპროტესტო აქციის მონაწილე ახალგაზრდებს მიმართავს.
დეპუტატის შეფასებით, აღნიშნული წერილიდან ჩანს, რომ სახელმწიფო იმ გულწრფელ ახალგაზრდებზეც იზრუნებს, ვინც შეცდომაშია შეყვანილი.
„ირაკლი კობახიძის ამ წერილში ნამდვილად იგრძნობოდა ის გულწრფელობა, რითაც ის მიმართავს საზოგადოების ყველა წევრს – ყველა ასაკის წარმომადგენელს და განსაკუთრებით, ახალგაზრდებს. ზოგადად, ასაკი ინდულგენცია არ არის. არაერთხელ გვახსოვს ისტორიაში თაობათა შორის დაპირისპირება. პრემიერის ეს წერილი ამ მხრივაც ნიშანდობლივია, რომ გულწრფელი ახალგაზრდების იმ ნაწილს, რომელიც შეცდომაშია შეყვანილი, (ზოგიერთი მათგანი შეიძლება შეგნებულად არის წასული ამ ძალადობრივ აქციებზე), ირაკლი კობახიძე მიმართავს. ის რომ, ახალგაზრდა ბერბიჭაშვილმა მოხუცი ილია ჭავჭავაძე მოკლა, ნათელი მაგალითია იმისა, რომ მხოლოდ ასაკით არ შეიძლება განისაზღვროს, რა არის მართალი და რა არის არასწორი. პრემიერის წერილში ჩანს, რომ სახელმწიფო იზრუნებს ყველა ახალგაზრდაზე, მათ შორის მათზეც, ვინც შეცდომაშია შეყვანილი“, – განაცხადა გურამ მაჭარაშვილმა.