მიხეილ სარჯველაძე
დასანანია, როდესაც პოლიტიკური პოპულიზმის მიღმა ვერაფერს კითხულობს, ვერაფერს სვამს დღის წესრიგში ჩვენი ქვეყნის ოპოზიცია, – ასე გამოეხმაურა გაერთიანებული კომიტეტების სხდომაზე „ლელოს“ წევრის, ანა ნაცვლიშვილის დასმულ კითხვას მიხეილ სარჯველაძე.
ადამიანის უფლებათა დაცვის კომიტეტის თავმჯდომარემ აღნიშნა, რომ ოპოზიციის კითხვების ერთადერთი მიზანი კანდიდატების შეურაცხყოფაა.
„ალბათ ერთადერთი, რითაც ჩვენი ქვეყანა მოლდოვასა და უკრაინას ჩამოუვარდება, მართლაც ჩვენი ქვეყნის ოპოზიციის ხარისხია. ვერცერთი კითხვა ვერ დაისვა ისეთი, რომელიც შეიძლება მართლაც საჭირბოროტო, საინტერესო იყოს. რა თქმა უნდა, ეს აბსოლუტურად გაბანკროტებული პოლიტიკოსის განცხადებებია, რომელიც მხოლოდ და მხოლოდ შეურაცხყოფის მიზნით არის ნათქვამი. არაფერი საქმიანი, კრიტიკულიც კი არ არის ამაში. რა თქმა უნდა, ეს გამოსვლა იყო მდაბიურიც და იმავდროულად დილეტანტურიც. მაპატიეთ, არავის წყენინება არ მინდა. მაგალითად, ნაწილი, რომელიც შინაგან საქმეთა მინისტრზე თავდასხმას უკავშირდებოდა, თითქოს არ კონტროლდება საზღვარი, არის პანიკის დათესვის ხელოვნური მცდელობა. თუ ვინმეს რამე გაეგება საზღვრისა და შსს-ს მუშაობის, ასეთ უპასუხისმგებლო, მავნებლურ განცხადებებს არ უნდა აკეთებდეს“, – აღნიშნა სარჯველაძემ.
ნაცვლიშვილის კითხვა საქართველოში რუსეთის მოქალაქეების შემოსვლას ეხებოდა. ოთხი კომიტეტის გაერთიანებულ სხდომაზე, მინისტრობის ოთხ კანდიდატს უსმენენ.