„ახალგაზრდობის რეგიონული ცენტრის“ ორგანიზებით მუნიციპალური ფორუმი გაიმართა, რომელსაც ბათუმის მერი არჩილ ჩიქოვანი, აჭარის ა.რ. მთავრობის თავმჯდომარე თორნიკე რიჟვაძე, ხელვაჩაურის მუნიციპალიტეტის მერის მოადგილე გიორგი ქარცივაძე, უმაღლესი საბჭოს დეპუტატი დავით ბაციკაძე და ახალგაზრდობის რეგიონული ცენტრის ხელმძღვანელი თამარ გაბაიძე ესწრებოდნენ.
ფორუმის ფარგლებში ახალგაზრდებს შესაძლებლობა ჰქონდათ, ადგილობრივი თვითმმართველობისა და მთავრობის წარმომადგენლებთან ერთად, განეხილათ ეფექტური დიალოგის პლატფორმები და საკომუნიკაციო არხები, წარედგინათ მათ მიერ შემუშავებული პროექტები და ემსჯელათ არსებულ გამოწვევებსა და მათი გადაჭრის გზებზე.
მუნიციპალურ ფორუმში 50-მდე ახალგაზრდა აჭარის ექვსივე მუნიციპალიტეტიდან ჩაერთო.
ფორუმის თემატიკას მუნიციპალურ დონეზე ახალგაზრდების მონაწილეობითი პოლიტიკა, სამოქალაქო პასუხისმგებლობა, ადგილობრივ ხელისუფლებასა და სამოქალაქო საზოგადოებას შორის თანამშრომლობის ეფექტური მექანიზმების ჩამოყალიბების გაძლიერება წარმოადგენდა.