უახლესი ინფორმაცია სტიქიის ზონიდან – ქეთი ხოსიტაშვილი

ამ ეტაპზე, მაშველების მიერ გადარჩენილი და უსაფრთხო ადგილზე გადაყვანილია 11 მოქალაქე, მათ შორის არიან მცირეწლოვნები და არასრულწლოვნები. ნაპოვნია ორი გარდაცვლილის ცხედარი და ერთი მოზარდის მიმართ გრძელდება სამძებრო სამუშაოები;

გარდაცვლილი სოფელ ჯუმათის მცხოვრები, 15 წლის თორნიკე ჩხარტიშვილია, ასევე სოფელ სილაურის მკვიდრი მოხუცი ქალი, რომლის საცხოვრებელი სახლი წუხელ განვითარებულმა მეწყერმა მთლიანად გაანადგურა. სტიქიის დროს ის სახლში მარტო იმყოფებოდა;

შსს-ს ცნობით, მოქალაქე, რომელიც სოფელ სუფსაში გადარჩენის მიზნით სიმაღლეზე იყო ასული, უსაფრთხო ადგილზეა გადაყვანილი;

ძლიერი წვიმის შედეგად, მდინარე აჭყვა კალაპოტიდან გადმოვიდა, რამაც ქალაქში რამდენიმე მისამართზე დატბორვა გამოიწვია.

ადიდებულია სხვა მდინარეების კალაპოტებიც, მათ შორის სუფსა, ჩამოწოლილია მეწყერი, დაზიანებულია საცხოვრებელი სახლები, ხიდები და სოფლებთან დამაკავშირებელი გზები;

ყველაზე მძიმე მდგომარეობა სოფლებში: ხორეთსა და ნინოწმინდაშია;

სტიქიამ გურიის რეგიონში ზიანი მიაყენა სოფელ ჯუმათს, სუფსას, ჯიხანჯირს, ჩოჩხათს, მამათს;

112-ში მოქალაქეებისგან ასზე მეტი შეტყობინება შევიდა;

გურიაში, სტიქიის ზონაში გეოლოგებისა და ჰიდროლოგების 6 ჯგუფი მუშაობს. მიმდინარეობს ტერიტორიების არა მარტო ვიზუალური დათვალიერება, არამედ ინსტრუმენტალური მონიტორინგი.

მდინარეების ადიდების გამო, მოძრაობა დროებით აკრძალულია საერთაშორისო და შიდასახელმწიფოებრივი მნიშვნელობის საავტომობილო გზების ორ მონაკვეთზე – შუხუთი-აცანა-მამათი-ძიმითის საავტომობილო გზის მე-2 და მე-12 კმ-ებზე ჩამოსული მიწის შვავისაგან გზის გაწმენდის სამუშაოები დაწყებულია;

ყველა სახის ავტოტრანსპორტის მოძრაობა დროებით, კვლავ აკრძალულია. ყველა სახის ავტოტრანსპორტის მოძრაობა აკრძალულია საერთაშორისო მნიშვნელობის სამტრედია-ლანჩხუთი-გრიგოლეთის საავტომობილო გზის მე-40 და 56-ე კმ-ებზეც. გზის აღნიშნული მონაკვეთი უხვი ნალექის გამო ადიდებულმა მდინარე ლესამ დააზიანა;

ადგილზე იმყოფებიან მთავრობის სხვადასხვა სტრუქტურების წარმომადგენლები, მათ შორის: შსს, საგანგებო სიტუაციების მართვის სააგენტო, რეგიონული განვითარებისა და ინფრასტრუქტურის სამინისტრო და საავტომობილო გზების დეპარტამენტი;

ოზურგეთის მუნიციპალიტეტის მერიამ ცხელი ხაზის ნომერი გამოაქვეყნა: 577 601 304. მოქალაქეებს გადაადგილებისგან თავის შეკავებისკენ მოუწოდებენ.”- წერს ქეთი ხოსიტაშვილი.