უკანონო დაკავება, განზრახ მკვლელობა და სამსახურებრივი უფლება მოსილების გადამეტება – სერჟანტ როინ შავაძის საქმეზე დაკავებული 10 ბრალდებულის სასამართლო პროცესი ამ წუთებში მიმდინარეობს.
სასამართლო აღკვეთის ღონისძიებაზე მსჯელობს. ეს არის საქმე, რომელშიც სტრასბურგმა სიცოცხლის უფლების როგორც პროცედურული, ასევე არსებითი ნაწილის დარღვევა დაადგინა.
„ბრალდებულები 15 წლის განმავლობაში მოქმედებდნენ ურთიერთშეთანხმებულად, რათა არ გახსნილიყო მოცემული დანაშაული. ისინი 15 წლის განმავლობაში კოორდინირებულად გამოძიებას აწვდიდნენ ცრუ ინფორმაციას, შემუშავებული ყალბი ვერსიის შესაბამისად, რათა მათი დანაშაულებრივი ქმედებები არ დადგენილიყო. გარდა ამისა, არის მოწმეზე ზემოქმედების კონკრეტული ფაქტები, ასევე ახალი დანაშაულის ჩადენის რისკები და მიმალვის საფრთხე. რის გამოც ბრალდების მხარე უალტერნატივოდ განიხილავს ბრალდებულთა მიმართ უმკაცრესი აღმკვეთი ღონისძიების, პატიმრობის გამოყენებას“, – განაცხადა პროკურორმა გიორგი მუჯირმა.
საქართველოს გენერალურმა პროკურატურამ თავდაცვის სამინისტროს ბრიგადის სერჟანტის 2008 წლის აგვისტოს ომის მონაწილის როინ შავაძის უკანონო დაკავების, განზრახ მკვლელობის და სამსახურებრივი უფლება-მოსილების გადამეტების ბრალდებით, სისხლის სამართლებრივი დევნა 10 პირის მიმართ დაიწყო.