ძალიან მნიშვნელოვანი და ისტორიული პროექტი გველის, რაც გულისხმობს იმას, რომ ჩვენს ქვეყანას ექნება ძალიან მსხვილი და შთამბეჭდავი ინფრასტრუქტურის მქონე ახალი საერთაშორისო აეროპორტი, – ამის შესახებ ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა გადაცემაში „იმედი LIVE“ განაცხადა.
მისი თქმით, სურთ შეიქმნას აეროპორტი, რომელიც იქნება მომავლის აეროპორტი, რომელიც უპასუხებს საერთაშორისო და შიდა მოგზაურების მოთხოვნებს.
„ჩვენ განვიხილავთ ორ ძირითად მიმართულებას, ერთია არსებული აეროპორტის შესაძლო განვითარება და უკვე დასრულებული გვაქვს განვითარების გეგმაზე მუშაობა. უკვე გვაქვს ფაქტობრივად სრული სურათი, რა არის ის მაქსიმალური შესაძლებლობა, რაც თბილისის საერთაშორისო აეროპორტს გააჩნია გაფართოების კუთხით და რა არის ის საკმაოდ ბევრი შეზღუდვა, რომელიც მას გააჩნია. მეორე მხრივ, უკვე დავიწყეთ შესწავლა ვაზიანის, როგორც ალტერნატიული ახალი ლოკაციის. მიმდინარე პერიოდში ტექნიკური კვლევების პროცესი გვაქვს. ვაწარმოებთ ტექნიკურ კვლევებს იმისთვის, რომ საქართველოს მთავრობამ მიიღოს შესაბამისი გადაწყვეტილება, თუ რა გზით არის ქვეყნისთვის უკეთესი განვითარება თბილისის საერთაშორისო აეროპორტის და რა გვინდა რომ მივიღოთ. ჩვენ გვინდა მივიღოთ აეროპორტი, რომელიც იქნება მომავლის აეროპორტი, რომელიც უპასუხებს საერთაშორისო და შიდა მოგზაურების მოთხოვნებს, იქნება ტრანზიტული, ლოჯისტიკური ჰაბი და ჩვენ შევძლებთ განვავითაროთ ისეთი საავიაციო სერვისები მათ შორის, როგორიც არის კარგო მიმართულება და სხვა“, – განაცხადა მარიამ ქვრივიშვილმა.