„მართალია, FARA-ს კანონი, რომელიც ამერიკაში საუკუნეა, წარმატებით მოქმედებს, საქართველოში თავად ამერიკელებმა არ მიგვაღებინეს, მაგრამ სწორედ ამ ამერიკამ გაგვაგებინა, თუ ვინ არიან უცხო ქვეყნის აგენტები საქართველოში“, – ამის შესახებ „ხალხის ძალის“ წევრმა, თამარ ჩიბურდანიძემ, სოციალურ ქსელში დაწერა
მისი თქმით, საეჭვოა, რომ მარგველაშვილი რამდენიმე ათასი დოლარის სანაცვლოდ იცავდეს სააკაშვილის მილიარდებს.
„წინაპრების გამონათქვამია: სირცხვილი (ცუდი ქმედება) რამდენიც არ უნდა მალო, თავს მაინც ვერ დამალავსო. ასე მოუვიდათ უცხო ქვეყნის აგენტებს საქართველოში. მართალია, FARA-ს კანონი, რომელიც ამერიკაში საუკუნეა, წარმატებით მოქმედებს, საქართველოში თავად ამერიკელებმა არ მიგვაღებინეს, მაგრამ სწორედ ამ ამერიკამ გაგვაგებინა, თუ ვინ არიან უცხო ქვეყნის აგენტები საქართველოში.
არ მეგონა, 11 000 დოლარადაც თუ აწერდნენ ხელს აგენტობაზე, ვფიქრობდი, უფრო „სარფიანად“ მუშაობდნენ, მაგრამ, სამწუხაროდ, თურმე სინდისი ყველანაირ თანხაზე იყიდება. სააკაშვილმა მილიარდები წაართვა საკუთარ ხალხს და მარგველაშვილი რამდენიმე ათას დოლარად იცავს მის მილიარდებს? ასე გაუჭირდა? თუ დამკვეთები არაფერს გეკითხებიან და თანხების რაოდენობასაც თავად განსაზღვრავენ? ასე იცის მონობამ, აგენტობამ და საკუთარი თავის დაკარგვამ.
რადგან ამერიკული კანონი არ მიგვაღებინეს საქართველოში სიმართლის გასაგებად და სხვისი მტრული ზრახვების დასამალად, ისევ გიული ალასანიას უნდა ვთხოვოთ, რაც შეიძლება მეტი ფული დახარჯოს და ამერიკიდან გაგვაგებინოს, ვინ არის ჩვენი ქვეყნის მოღალატე. ეს ისედაც ვიცით, მაგრამ სახელმწიფო დეპარტამენტის გვერდიდან მიღებულ ოფიციალურ ინფორმაციას სულ სხვა ძალა აქვს“, – წერს თამარ ჩიბურდანიძე.