ყველა აგრესორს აქვს გარკვეული სტანდარტი, რომლის მიხედვითაც იწყებენ მოქმედებას. ეს სტანდარტი ფაქტობრივად არ იცვლება და მთავარი დატვირთვა გადადის ძირითადად მოწინააღმდეგის დადანაშაულებაში მის წინააღმდეგ აგრესიული ქმედების გამო, – ამის შესახებ ექსპერტი გია გაბრიჭიძე სოციალურ ქსელში რუსეთის დუმის დეპუტატის, დსთ-ს, ევრაზიული ინტეგრაციისა და თანამემამულეებთან ურთიერთობის კომიტეტის თავმჯდომარის მოადგილე კონსტანტინ ზატულინის განცხადებასთან დაკავშირებით წერს.
გაბრიჭიძის თქმით, ზატულინის განცხადება იმის შესახებ, რომ უმჯობესი იქნებოდა „რუსეთი დალოდებოდა უკრაინის მხრიდან სამხედრო მოქმედებების დაწყებას და შემდეგ ეპასუხა, რაც აარიდებდა რუსეთს ფართომასშტაბიან სანქციებს”, გულისხმობს საქართველოში 2008 წელს განვითარებულ სცენარს, რომელშიც სააკაშვილის გაუაზრებელმა ქმედებებმა, აგრესორ ქვეყანას საქართველოში შემოჭრის საშუალება მისცა.
„ყველა აგრესორს აქვს გარკვეული სტანდარტი, რომლის მიხედვითაც იწყებენ მოქმედებას. ეს სტანდარტი ფაქტობრივად არ იცვლება და მთავარი დატვირთვა გადადის ძირითადად მოწინააღმდეგის დადანაშაულებაში მის წინააღმდეგ აგრესიული ქმედების გამო. ამ საქმეში ყველაზე გამორჩეული და მრავალმხრივი ფაშისტური გერმანია იყო. ის თავდასხმის მიზეზად აბსოლუტურად ყველა არსებულ საშუალებას იყენებდა. მაგალითად პოლონეთში იმ მიზეზით შეიჭრა, რომ თითქოს პოლონელი მესაზღვრეები გერმანელ მესაზღვრეებს დაესხნენ თავს და დახოცეს. სინამდვილეში კი ის დაღუპული ადამიანებიც და თავდამსხმელებიც გერმანულ და პოლონურ სამხედრო ფორმაში გადაცმული პატიმრები იყვნენ. ჩეხოსლოვაკიის ანექსია იქ მცხოვრები გერმანელების დასაცავად მოახდინა, ხოლო ავსტრიამ „თავად სთხოვა“ მიერთება.
დღეს ეს ფაქტები საყოველთაოდ ცნობილია, როგორც ისე, თუ რა მიზეზის გამო მოახდინა რუსეთმა საქართველოს ტერიტორიების ოკუპაცია 2008 წელს. აქაც უმთავრესი პირველ რიგში დასავლეთის ძლიერი ქვეყნების უნიათობა და შემდეგ თითიდან გამოწოვილი პროვოკაციული საბაბი იყო, რისი განხორციელებისთვის სააკაშვილის გაუაზრებელმა (ან იქნებ წინასწარ გამიზნულმა) ქმედებებმა მისცა საუძველი. რუსეთის სახელმწიფო სათათბიროს დსთ-ის საქმეთა კომიტეტის თავმჯდომარის პირველმა მოადგილემ, კონსტანტინე ზატულინმა განაცხადა, რომ უმჯობესი იქნებოდა უკრაინაში „საქართველოს სცენარი“ განხორციელებულიყო. „რუსეთი დალოდებოდა უკრაინის მხრიდან სამხედრო მოქმედებების დაწყებას და შემდეგ ეპასუხა, რაც აარიდებდა რუსეთს ფართომასშტაბიან სანქციებს“. „საქართველოს სცენარი“, რომელიც ხელისუფალთა უაზრო ქმედების აგრესიისთვის გამოყენებას ითვალისწინებს“ – წერს გაბრიჭიძე Facebook-ზე.