“ნაციონალური მოძრაობის” წევრი გიორგი ბარამიძე, რომელიც 21 თებერვლიდან უკრაინაში იმყოფება, ყოფილ პრემიერ-მინისტრ იულია ტიმოშენკოს შეხვდა. როგორც ის წერს, ტიმოშენკომ მას აღუთქვა მაქსიმალური მხარდაჭერა მიხეილ სააკაშვილის უსწრაფესად გათავისუფლებასთან დაკავშირებით:
კიევში, ძალიან სასარგებლო შეხვედრა მქონდა ქალბატონ იულია ტიმოშენკოსთან.
მას პრეზიდენტ სააკაშვილის მეგობრული, დიდი მოკითხვა გადავეცი. გავაცანი საქართველოს შიდაპოლიტიკური ვითარება და ინფორმაცია მიშას ფიზიკური მდგომარეობისა და საერთაშორისო მასშტაბით, მისი გათავისუფლებისთვის მიმდინარე საქმიანობის შესახებ.
კიდევ ერთხელ ავღნიშნეთ ქართველი ჯარისკაცების უკრაინისთვის ბრძოლის მნიშვნელობა, და ის დიდი მსხვერპლი რაც ჩვენ ამ ომში უკვე გავიღეთ.
მან, როგორც უკრაინული პოლიტიკის ერთერთმა ყველაზე მნიშვნელოვანმა ფიგურამ, ქართველ ხალხს მადლობა გადაუხადა საერთო მტერთან ბრძოლაში გვერდში დგომისათვის და
იმედი გამოთქვა, რომ მთელი ცივილიზირებული სამყაროს დახმარებით, უკრაინა რაშისტულ ბოროტებას აუცილებლად დაამარცხებს. აღმითქვა მაქსიმალური მხარდაჭერა და ძალისხმევის განხორციელება, მიშას უსწრაფესად გათავისუფლებისათვის.
დიდება საქართველოს!
#თავისუფლებამიშას!
Slava Ukrayni!”- წერს ბარამიძე.