პარლამენტის პლენარულ სხდომაზე, დეპუტატებმა „განათლების ხარისხის განვითარების შესახებ“ კანონში შესატანი ცვლილებები 74 ხმით მიიღეს, – ამის შესახებ ინფორმაციას პარლამენტის პრესსამსახური ავრცელებს.
მათივე ინფორმაციით, კანონმდებლებმა საბოლოო, მესამე მოსმენით მიიღეს ასევე თანმდევი კანონპროექტები, კერძოდ, ზოგადი და უმაღლესი განათლების შესახებ კანონებში შესატანი ცვლილებების პროექტები.
ცვლილებები ითვალისწინებს ზოგადსაგანმანათლებლო დაწესებულებების საგანმანათლებლო პროგრამების აკრედიტაციის გაუქმებას. ცვლილებების თანახმად, საჯარო სამართლის იურიდიული პირი – განათლების ხარისხის განვითარების ეროვნული ცენტრი განახორციელებს ზოგადსაგანმანათლებლო დაწესებულებების ავტორიზაციას.
გარდა ამისა, კანონის პროექტით ახლებურად დარეგულირდება სტატუსის მაძიებლის თვითშეფასებასთან, ავტორიზაციის სამართლებრივ შედეგებთან და ავტორიზაციაზე უარის თქმის შესახებ გადაწყვეტილებასთან დაკავშირებული საკითხები.