IMG.GE ___________________________________ IMG.GE

სამწუხაროა, რომ პანდემიამ შეცვალა ჩვენი დღის წესრიგი, მაგრამ ასევე გლობალური პანდემიის პირობებში გამოჩნდა, რომ ჩვენ გვაქვს ქმედითი სახელმწიფო ინსტიტუტები, გამოჩნდა, რომ პრემიერ-მინისტრის, ხელისუფლების ლიდერობითა და ხელმძღვანელობით საქართველომ შეძლო ამ ურთულეს გამოწვევასთან გამკლავება, – ამის შესახებ პარლამენტის თავმჯდომარემ, არჩილ თალაკვაძემ სახელმწიფო საგრანტო პროექტ „დიასპორული ინიციატივების ხელშეწყობის“ გამარჯვებულების დასახელების ცერემონიაზე განაცხადა.

მისი თქმით, საქართველოს ხელშესახები პროგრესი აქვს ყველა მიმართულებით, იქნება ეს დემოკრატიის გაძლიერება, ბიზნესის თუ ქვეყანაში სტაბილურობის დაცვა.

„დღეს ყველა ჩვენგანის ამოცანაა, მოვახდინოთ ჩვენი ეკონომიკის სტაბილიზაცია და რაც შეიძლება სწრაფად შევძლოთ ჩვენი ეკონომიკის აღდგენა. ამისთვის კეთდება ყველაფერი. ჩვენ ყოველთვის ვამბობდით, რომ საქართველოს ხელშესახები პროგრესი აქვს ყველა მიმართულებით. დემოკრატია ძლიერდება, ადამიანის უფლებების დაცვის სტანდარტი დღეს ბევრად უფრო მაღალია. ჩვენ ყველაზე უკეთესად შევძელით დაგვეცვა ბიზნესის თავისუფლება, საკუთრების უფლება. ჩვენ ყველაზე უკეთ შევძელით დაგვეცვა მშვიდობა და სტაბილურობა ჩვენს ქვეყანაში. დღეს საქართველოს აქვს სრული შესაძლებლობა, რომ განაგრძოს განვითარება და რასაკვირველია, 2020 წლის არჩევნები არის მნიშვნელოვანი შესაძლებლობა, რომ საქართველომ გადადგას კიდევ ერთი გაბედული ნაბიჯი უფრო ძლიერი დემოკრატიისკენ, გადადგას ნაბიჯი ევროინტეგრაციისკენ. ჩვენთვის ევროპული და ევროატლანტიკური კურსი პრიორიტეტული არჩევანია და რა თქმა უნდა, საზოგადოების მხარდაჭერით ჩვენ დარწმუნებული ვართ, რომ დადგება დრო, როდესაც საერთაშორისო თანამეგობრობა მიიღებს მნიშვნელოვან გადაწყვეტილებებს, საქართველო გახდება ნატოს და ევროკავშირის წევრი.

ჩვენი საგარეო პოლიტიკა საგარეო საქმეთა სამინისტროსთან ერთად არის პრაგმატული, სახელმწიფოებრივი და სწორი, ვინაიდან ამ წლების განმავლობაში ჩვენ შევძელით საერთაშორისო მხარდაჭერის მობილიზება და ყველა მნიშვნელოვან მომენტში ჩვენი მეგობრები იყვნენ ჩვენ გვერდით და ჩვენ მომავალშიც გვაქვს მათი მხარდაჭერა“, – განაცხადა არჩილ თალაკვაძემ.

კომენტარის დატოვება
IMG.GE
გაზიარება