IMG.GE ___________________________________ IMG.GE

გიორგი შაქარაშვილის საქმეზე 11 სრულწლოვანი ბრალდებულისთვის სასამართლოს უარს ადვოკატების ნაწილი ასაჩივრებს. საუბარია მცხეთის სასამართლოს გუშინდელ გადაწყვეტილებაზე, რომლითაც დაკავებულებს აღკვეთის ღონისძიების გადასინჯვაზე უარი ეთქვათ და ყველა მათგანი პატიმრობაში დარჩა.

უფლებადამცველების თქმით, მოსამართლის მიერ მიღებული დასკვნისთვის შესაბამისი მტკიცებულებები არ არსებობს, თუმცა მოლოდინი, რომ გასაჩივრებით რაიმე შეიცვლება არ აქვთ.

“სასამართლომ ძალაში დატოვა გამოყენებული აღკვეთის ღონისძიება – პატიმრობა. ჩვენ გავასაჩივრებთ ამ განჩინებას, ვინაიდან მას არ ვეთანხმებით და მიგვაჩნია რომ არცერთ შემთხვევაში არ უნდა იყოს გამოყენებული არცერთი აღკვეთის ღონისძიება. ალტერნატივის სახით ჩვენ ვთავაზობდით გირაოს, რომელიც არ გაითვალისწინა სასამართლომ. გადაწყვეტილებას გავასაჩივრებთ, მაგრამ იმის მოლოდინი მაინც არ გვაქვს, რომ სააპელაციო სასამართლო გადაწყვეტილებას შეცვლის,”- აცხადებს არჩილ გაგნიძის და ვასილ მახარაძის ადვოკატი ბექა ნემსიწვერიძე.

სხვა მოლოდინი სასამართლოსგან არც გიგა ტატიაშვილის ადვოკატს ჰქონია. ის აბსურდულს უწოდებს აღკვეთის ღონისძიების სახით პატიმრობის გამოყენებას და მიიჩნევს, რომ მისი დაცვის ქვეშ მყოფისთვის არა გირაოს შეფარდებას, არამედ მის პირდაპირ გათავისუფლებას მოითხოვდა.

“სასამართლოს ამ გადაწყვეტილების მოლოდინი გვქონდა და ვიცოდით, რომ არაფერი შეიცვლებოდა. მე არ ვითხოვდი გირაოს, ჩემი მოთხოვნა პირდაპირ ტატიაშვილის ციხიდან გამოშვება იყო. აღკვეთის ღონისძიების გამოყენება ადამიანზე, რომელსაც საერთოდ არ აქვს საქმესთან შემხებლობა, კანონდარღვევაა. ჩვენ აღნიშნულს გავასაჩივრებთ უბრალოდ გასაჩივრებისთვის და არა შედეგისთვის, რადგან ეს ჩვენთვის წინასწარ ცნობილია. მუშაობს მანქანა იმისათვის, რომ ზოგადად შესრულდეს ის, რომლის სცენარიც წინასწარ არის დაწერილი,”- აღნიშნავს გიგა ტატიაშვილის ადვოკატი გიორგი ყიფშიძე.

რაც შეეხება არჩილ გაგნიძის ადვოკატის განმარტებას, მოსამართლის გადაწყვეტილების გასაჩივრებას ისიც აპირებს, თუმცა სხვა ადვოკატების მსგავსად მოლოდინი იმისა, რომ რაიმე შეიცვლება – არ აქვს.

“ჩვენ არ გვქონდა სხვა მოლოდინი, თუმცა სასამართლოს შევთავაზეთ დასაბუთება. თუმცა მან მაინც ის გადაწყვეტილება გამოიტანა, რაც გეგმაში იყო და ამის შემდეგ დატოვა სხდომათა დარბაზი. ჩვენს სხვადასხვა სახით შუამდგომლობა გვქონდა. იმედი არ გვაქვს რომ მოსამართლე რაიმე დასაბუთებას შემოგვთავაზებს, მაგრამ გადაწყვეტილებას მაინც გავასაჩივრებთ,”- აცხადებს არჩილ გაგნიძის ადვოკატი ვასილ მამულაშვილი.

კომენტარის დატოვება
IMG.GE
გაზიარება