აშშ-ის პრეზიდენტმა, ჯო ბაიდენმა უკრაინის ქალაქ კრამატორსკში, რკინიგზის სადგურზე მომხდარი თავდასხმა დაგმო და აღნიშნა, რომ ეს არის რუსეთის მიერ ჩადენილი მორიგი შემზარავი სისასტიკე.
„უკრაინის რკინიგზის სადგურზე თავდასხმა კიდევ ერთი შემზარავი სისასტიკეა, რომელიც რუსეთმა ჩაიდინა, დაარტყა სამოქალაქო პირებს, რომლებიც ევაკუაციას და უსაფრთხო ადგილზე მისვლას ცდილობდნენ. აშშ გააგრძელებს უკრაინის უსაფრთხოების საკითხებში დახმარებას და თავდაცვისთვის იარაღის მიწოდებას. ჩვენს მოკავშირეებთან და პარტნიორებთან ერთად, ჩვენ მხარს დავუჭერთ ამ თავდასხმის გამოძიების მცდელობებს, რუსეთის ქმედებების დოკუმენტირებით და მათზე პასუხისმგებლობის დაკისრებით“, – წერს ჯო ბაიდენი Twitter-ზე.
ავიადარტყმის დროს კრამატორსკის სადგურზე დაახლოებით 4000 ადამიანი იმყოფებოდა, რომლებიც ევაკუაციას ელოდებოდნენ. სარაკეტო დარტყმის შედეგად დაიღუპა 52 ადამიანი, 109 კი დაშავდა.