უკრაინის ჩრდილოეთიდან რუსული ჯარების მასობრივი გადაადგილებისთვის სულ მცირე ერთი კვირა იქნება საჭირო. ინფორმაციას ამის შესახებ დიდი ბრიტანეთის თავდაცვის სამინისტროს დაზვერვა ავრცელებს.
„უკრაინის ჩრდილოეთ ნაწილიდან რუსული ჯარები სრულად გაყვანილია ბელარუსსა და რუსეთში, მათი ნაწილი უკრაინის აღმოსავლეთში, დონბასში საომრად იქნება გადასროლილი. ამ ძალებს სერიოზული განახლება დასჭირდება, ვიდრე ისინი უკრაინის აღმოსავლეთში საბრძოლო მზადყოფნაში მოვლენ. ჩრდილოეთიდან ნებისმიერი მასობრივი გადაადგილებისთვის სულ მცირე ერთი კვირა იქნება საჭირო. აღმოსავლეთსა და სამხრეთში რუსეთი უკრაინულ ქალაქებზე იერიშების მიტანას აგრძელებს. რუსული ჯარი წინ წაიწია სამხრეთის მიმართულებით, სტრატეგიულად მნიშვნელოვანი იზიუმიდან, რომელიც კვლავ მათი კონტროლის ქვეშ რჩება“, – აღნიშნულია ინფორმაციაში.