რუსთავის მერი ნინო ლაცაბიძე რეგიონული მედიის წარმომადგენლებს შეხვდა

რუსთავის მერმა ნინო ლაცაბიძემ, მედიის წინაშე სამთვიანი საქმიანობის ანგარიში წარადგინა და შეკითხვებს უპასუხა.

როგორც ნინო ლაცაბიძემ აღნიშნა, რეგიონულ მედიასთან შეხვედრა სისტემატურ სახეს მიიღებს და ყოველ სამ თვეში ერთხელ, მედიას და რუსთაველებს ამ ფორმით, გაწეული საქმიანობის შესახებ ანგარიშს წარუდგენს.

,,ჩვენ გადავწყვიტეთ, რომ გარკვეული პერიოდულობით შევხვდეთ ადგილობრივი მედიის წარმომადგენლებს. მათთან ერთად ვისაუბროთ ქალაქში მიმდინარე და დაგეგმილ პროექტებზე. ასევე, ვუპასუხოთ ყველა იმ კითხვას, რომელიც არსებობს. კონკრეტულად ვისაუბრეთ პრობლემების გადაჭრის გზებზე, რომელიც დღეს არის ქალაქში და ჩვენგან კიდევ უფრო სწრაფ ჩარევას ან მოგვარების გზების მოძებნას საჭიროებს.

ვფიქრობ, რომ საინტერესო ფორმატია. მოსახლეობასთან ღია და გამჭვირვალე ურთიერთობა ჩვენ პირისპირ შეხვედრებით გვაქვს, თუმცა ვფიქრობ, რომ ამ სივრცის გამოყენებით და მედიასთან ამ ფორმის შეხვედრით, ჩვენ კიდევ უფრო მნიშვნელოვან და დამატებით ინფორმაციას მივაწვდით მათ“, – განაცხადა რუსთავის მერმა ნინო ლაცაბიძემ ჟურნალისტებთან საუბრისას.

რუსთავის მერმა ადგილობრივი და ცენტრალური მედიის წარმომადგენლების, ასევე მოსახლეობისგან სოცქსელში დასმულ კითხვებს უპასუხა. ნინო ლაცაბიძემ დეტალურად ისაუბრა წლის განმავლობაში დაგეგმილ და უკვე მიმდინარე მსხვილ ინფრასტრუქტურულ პროექტებზე, ეკოლოგიის გაუმჯობესების მიზნით გადადგმულ ნაბიჯებზე, უსაფრთხო და მწვანე ქალაქის კონცეფციაზე, სოციალურ და სტუდენტურ პროგრამებზე, არაფორმალურ განათლებაზე, ურბანულ განვითარებაზე, მუნიციპალური სერვისებისა და ტრანსპორტის სფეროში უკვე განხორციელებულ და დაგეგმილ რეფორმებზე.