საქართველოს რეგიონული განვითარებისა და ინფრასტრუქტურის მინისტრი ირაკლი ქარსელაძე აზერბაიჯანის რესპუბლიკის ეკოლოგიისა და ბუნებრივი რესურსების მინისტრს, მუხთარ ბაბაევს შეხვდა, – ამის შესახებ ინფორმაციას რეგიონული განვითარებისა და ინფრასტრუქტურის სამინისტრო ავრცელებს.
მათივე ინფორმაციით, შეხვედრას აზერბაიჯანის რესპუბლიკის ეკოლოგიისა და ბუნებრივი რესურსების სამინისტროს დელეგაციის წევრები და საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიის ხელმძღვანელი ალექსანდრე თევდორაძე ესწრებოდნენ.
შეხვედრაზე მხარეებმა აღნიშნეს ორ ქვეყანას შორის არსებული მრავალწლიანი თანამშრომლობისა და პარტნიორობის მნიშვნელობა.
ირაკლი ქარსელაძემ სტუმრებს მიაწოდა ინფორმაცია საქართველოში მიმდინარე მნიშვნელოვანი ინფრასტრუქტურული პროექტების შესახებ და ისაუბრა ქვეყნის ინფრასტრუქტურის განვითარების სტრატეგიულ ხედვაზე.
შეხვედრაზე გამოიკვეთა ახალი შესაძლებლობები გამოცდილების გაზიარების თვალსაზრისით, რაზეც მხარეები მუშაობას გააგრძელებენ და სამინისტროებს შორის ურთიერთობა უფრო ინტენსიური გახდება.