გიორგი ვოლსკი ამერიკელი სენატორების მხრიდან საქართველოში დემოკრატიის ხარისხზე გაკეთებულ კრიტიკულ განცხადებებს გამოეხმაურა. ამ თემაზე პარლამენტის პირველმა ვიცე-სპიკერმა გადაცემაში „იმედი LIVE“ ისაუბრა.
მან ამ პროცესში „ნაციონალური მოძრაობის“ საგარეო პოლიტიკის ფაქტორს გაუსვა ხაზი და აღნიშნა, რომ ამ შემთხვევაში ეს პარტია მხოლოდ ანტურაჟია და საუბარი უფრო დიდ ფსონებზეა და საქართველოს გარშემო უფრო დიდი ხიფათის შემცველი პოზიციებია.
ვიცე-სპიკერმა ასევე აღნიშნა, რომ მმართველი გუნდი საერთაშორისო პარტნიორებთან აქტიურად მუშაობს და ამ ეტაპზე საზღვარგარეთ რამდენიმე დელეგაცია იმყოფება, სხვადასხვა ქვეყანაში ვიზიტები განახორციელა ქვეყნის პრემიერ-მინისტრმაც.
„მეორე საკითხია კიდევ რუსეთის ფაქტორი. არ არსებობს, რომ რუსეთს, რომელიც ამ ყველაფერს აკვირდება, არ აწყობდეს დესტაბილიზაცია საქართველოში, რომ მისი ალტერნატიული დერეფანი არ გაიხსნას ენერგორესურსებისთვის. ვერ დავაბრალებ, რომ „ნაციონალური მოძრაობა“ არის რუსეთის ფედერაციის აგენტურა, ცოტა ხისტად გამომივა, თორემ ისე რომ დაფიქრდე, ინტერესი, რომელიც აქვს ორივე მხარეს, ზუსტად ემთხვევა, ოღონდ სხვადასხვა მიზანი აქვს ერთსაც და მეორესაც“, – განაცხადა ვოლსკიმ.