ჩვენ თუ მართლა ევროინტეგრაცია გვინდა, ახლა ერთად უნდა ვიკრიბებოდეთ სადმე და ვმსჯელობდეთ, შემდეგი ნაბიჯი როგორ გადავდგათ, რომ ეს შანსი გამოვიყენოთ. როგორც ყოველთვის ხდება ჩვენს პოლიტიკაში, ისევ შიდა დაპირისპირებაში გადავიტანეთ, – ამის შესახებ ალექსანდრე რაქვიაშვილმა „ქრონიკაში“ ევროკომისარ ოლივერ ვარჰეის ვიზიტის შეფასებისას განაცხადა.
„გირჩის“ ერთ-ერთი ლიდერის თქმით, ვარჰეის ჰქონდა ძალიან კონკრეტული გზავნილები, რაც ევროპელმა პარტნიორებმა არაერთხელ გააჟღერეს. კერძოდ, რომ რეფორმებზე მუშაობა ერთობლივად უნდა მიმდინარეობს და ქვეყანამ კანდიდატის სტატუსის მიღების შანსი ხელიდან არ უნდა გაუშვას, რადგან არავინ იცის როდის მიიღებს ასეთ შესაძლებლობას.
რაქვიაშვილი ოპოზიციის ნაწილის მიერ ვარჰეის კრიტიკასაც გამოეხმაურა, რომლებიც ევროკომისრის რუსულ კავშირებზე საუბრობდნენ.
„ზოგადად, ეს უცნაურია, როცა ასეთ ადამიანს ასე აფასებ, მაგრამ ძალიან ხშირად ჩვენ, პოლიტიკოსები, როგორც მმართველი გუნდიდან, ასევე ოპოზიციიდან, როცა რაღაც შეფასება არ მოსწონთ, პირადზე გადადიან. ამის მიუხედავად, რომ დავფიქრდეთ რა გზავნილები მოდის ევროპიდან ჩვენკენ, რაღაცნაირად კეთილგანწყობილები არიან და უნდათ, რომ ჩვენ ეს დაპირისპირება რაღაცნაირად გადავლახოთ. სამწუხაროდ, ამ გზავნილებს რატომღაც არ ვუსმენთ, იმიტომ რომ ჩვენ უფრო გვაღელვებს არა ევროინტეგრაცია ზოგადად, არამედ ის, რომ ეს ევროინტეგრაცია კონკრეტულ პოლიტიკურ ძალას მიეწეროს და თუ ასე არ ხდება, მაშინ ყველაფერი გავაკეთოთ იმისთვის, რომ სარგებელი არავინ მიიღოს“, – განაცხადა რაქვიაშვილმა.