გიორგი ამილახვარი „ნაციონალური მოძრაობის“ თავმჯდომარის პოსტისთვის ბრძოლაში ლევან ხაბეიშვილის ჩართვას გამოეხმაურა. საპარლამენტო უმრავლესობის წევრი ხაბეიშვილს „ცნობილ პოლიტიკურ მასხარას“ უწოდებს და აღნიშნავს, რომ მისი ჩართვა პარტიის ლიდერობისთვის ბრძოლაში „ნაცმოძრაობაში“ პოლიტიკური და ინტელექტუალური რესურსის არარსებობის მაჩვენებელია.
„როგორც ჩანს, მრავალდღიანი ყოყმანის შემდეგ ცნობილმა პოლიტიკურმა მასხარამ მაინც მიიღო გადაწყვეტილება მონაწილეობა მიიღოს „ნაციონალური მოძრაობის“ თავმჯდომარის არჩევნებში. ხაბეიშვილის არჩევის შემთხვევაში (და ვფიქრობთ, რომ დიდი ალბათობით ეს ასეც მოხდება) ეს „ნაციონალური მოძრაობის“ პირდაპირი დიაგნოზი იქნება – თუ რამდენად გამოცლილია უკვე „ნაციონალური მოძრაობა“ როგორც პოლიტიკური, ასევე ინტელექტუალური რესურსისგან და საზოგადოებას თავის თავმჯდომარის პოსტზე სთავაზობს ადამიანს, რომელსაც არაფერი გაუკეთებია თავის ცხოვრებაში, გარდა იმისა, რომ არის ცნობილი პოლიტიკური ტაკიმასხარა“, – განაცხადა ამილახვარმა.
„ნაციონალური მოძრაობის“ პარტიის თავმჯდომარის პოსტზე, ლევან ხაბეიშვილმა საკუთარი კანდიდატურა დაასახელა. ის პარტიის თავმჯდომარის არჩევნებში მიიღებს მონაწილეობას.