შალვა პაპუაშვილმა ნოდარ ნათაძის ოჯახს, მეგობრებსა და ახლობლებს მიუსამძიმრა. პარლამენტის თავმჯდომარის შესაბამის განცხადებას საკანონმდებლო ორგანოს პრესსამსახური ავრცელებს.
„საქართველოს პარლამენტის სახელით ღრმა მწუხარებას გამოვთქვამ საქართველოს რესპუბლიკის პირველი მოწვევის უზენაესი საბჭოს წევრის, საქართველოს მესამე მოწვევის პარლამენტის წევრის, ენათმეცნიერისა და საზოგადო მოღვაწის, ბატონ ნოდარ ნათაძის გარდაცვალების გამო. ნოდარ ნათაძე 1990-1991 წლებში იყო საქართველოს რესპუბლიკის პირველი მოწვევის უზენაესი საბჭოს წევრი, ხოლო 1992-1995 წლებში – საქართველოს მე-3 მოწვევის პარლამენტის წევრი. ის არის 1991 წლის 9 აპრილს მიღებული საქართველოს სახელმწიფოებრივი დამოუკიდებლობის აღდგენის აქტის ერთ-ერთი ხელმომწერი. ნოდარ ნათაძემ თავისი სამეცნიერო და პუბლიცისტური ნაშრომებით მნიშვნელოვნად გაამდიდრა საქართველოს აკადემიური საზოგადოება. საქართველოს პარლამენტის სახელით თანავუგრძნობ ბატონ ნოდარ ნათაძის ოჯახს, მეგობრებსა და ახლობლებს“, – აღნიშნულია პარლამენტის თავმჯდომარის განცხადებაში.
ქართველი პოლიტიკოსი, ლიტერატურათმცოდნე და ენათმეცნიერი ნოდარ ნათაძე 93 წლის ასაკში გარდაიცვალა.