პრემიერ-მინისტრი ირაკლი ღარიბაშვილი, საქართველოს ტელევიზიის პირველი დიქტორის, ლია მიქაძის გარდაცვალების გამო მწუხარებას გამოთქვამს და სამძიმრის წერილს აქვეყნებს:
“მწუხარებას გამოვთქვამ საქართველოს ტელემაუწყებლობის სახელოვანი ტელეწამყვანის ლია მიქაძის გარდაცვალების გამო.
ლია მიქაძე იყო საქართველოს ტელევიზიის პირველი სახე, რომელიც მთაწმინდის ტელეხედვის სტუდიიდან პირველად მიესალმა საქართველოს და ტელევიზიის დაბადება ახარა.
მისი მაღალი პროფესიონალიზმისა და აკადემიური სტილის გამო ხალხმა ის დამსახურებულად შეიყვარა და თითქმის ნახევარი საუკუნის განმავლობაში ადევნებდა თვალს მის მოღვაწეობას. ვუსამძიმრებ ოჯახს, მეგობრებს, ახლობლებსა და კოლეგებს.”- წერს ირაკლი ღარიბაშვილი.
ლია მიქაძე 86 წლის ასაკში 10 ნოემბერს გარდაიცვალა.
“მარშალპრესი” მწუხარებას გამოთქვამს და უსამძიმრებს მის ოჯახს.