საქართველოს პარლამენტის პირველი ვიცე-სპიკერის, გიორგი ვოლსკის განცხადებით, არ არსებობს არცერთი ავტორიტეტული საერთაშორისო ორგანიზაციის კვლევა, სადაც ჩვენი სასამართლო უარყოფითად არის შეფასებული.
მისივე თქმით, საერთაშორისო ორგანიზაციების კვლევებში სასამართლო მოწინავეთა რიგებშია.
„ჩვენი ოპონენტების პრობლემა ზოგადად ის არის, რომ არ არსებობს არცერთი ავტორიტეტული საერთაშორისო ორგანიზაციის კვლევა, სადაც ჩვენი სასამართლო უარყოფითად არის შეფასებული, პირიქით, მოწინავეთა რიგებშია სასამართლო. მათ აღელვებთ ეს თემა. ეს არის ის მთავარი თემა, რომლითაც ისინი სპეკულირებენ სასამართლოზე საუბრის დროს“, – განაცხადა გიორგი ვოლსკიმ.
ევროპული რეკომენდაციების მესამე პუნქტის შესრულების მიზნით, პარლამენტი მორიგ ცვლილებებს იღებს. სასამართლო რეფორმის სამუშაო ჯგუფის ფორმატში მომზადებული საკანონმდებლო ცვლილებები ექვს მიმართულებას მოიცავს. მათ შორის უმჯობესდება რაიონული ან სააპელაციო სასამართლოს მოსამართლის განწესების წესი. სავალდებულო ხდება იუსტიციის უმაღლესი საბჭოს არა მოსამართლე წევრის არჩევისას კანდიდატების იურიდიულ კომიტეტში საჯარო მოსმენა.