ვფიქრობ, დეკემბერში ჩვენ, როგორც ხელისუფლება, ღირსეულად წარვდგებით ევროკავშირის სტრუქტურების წინაშე, როდესაც რეკორდულ დროში განხორციელებულ რეფორმებს წარვადგენთ, – ამის შესახებ საქართველოს კულტურის, სპორტისა და ახალგაზრდობის მინისტრმა, თეა წულუკიანმა განაცხადა.
მისი თქმით, 12 რეკომენდაციის შესრულებაზე მუშაობა საქართველოს პარლამენტმა, უფრო კონკრეტულად კი, საპარლამენტო უმრავლესობამ და ოპოზიციის სულ რამდენიმე წარმომადგენელმა ძალიან აქტიურად აწარმოეს.
„რაც შეეხება „ნაციონალურ მოძრაობას“ და სხვა დესტრუქციულ ოპოზიციას, მათ არ იღეს ყურად ათასჯერ შეხსენებული რეკომენდაცია ევროკავშირელების მხრიდან, რომ ისინი მმართველ პარტიასთან ერთად დამსხდარიყვნენ და ემუშავათ 12 რეკომენდაციაზე. ეს არ არის ჩვენი პრობლემა, ეს მათი პრობლემა. რეალურად ჩვენ ვხედავთ, რომ დეპოლარიზაციას როდესაც საყვედურობდნენ სახელისუფლებო გუნდს, ამ თეორიამ, რომ ეს სახელისუფლებო გუნდის ბრალია, კრახი განიცადა“, – განაცხადა თეა წულუკიანმა.