ხატია დეკანოიძე – მეგის ქარდავა უნდა დაისაჯოს

2411
წაკითხვა/ნახვა
რეკლამა -------------------- IMG.GE

მეგის ქარდავას განუსაზღვრელი ძალაუფლება რომ ჰქონდა და ცუდად იყენებდა, უნდა წარდგეს მართლმსაჯულების, ხაზს ვუსვამ, ობიექტური მართლმსაჯულების წინაშე, – განაცხადა თემის კომენტირებისას „ნაციონალური მოძრაობის“ წარმომადგენელმა, ხატია დეკანოიძემ.

დეკანოიძის თქმით, მას არ უჭირს წინა ხელისუფლების პირობებში არსებულ სისტემურ პრობლემებზე საუბარი.

„პირველ რიგში, ძალიან გულწრფელად მინდა, გითხრათ, რომ ძალიან მძიმე და ცუდია, როდესაც წინა ხელისუფლების დროს გარკვეულ პროგრესს ჩრდილი მიაყენა ზუსტად ადამიანების გარკვეულმა წრემ, ვისაც გადამეტებული ძალაუფლების გამო, ხელში ჩაუვარდა ამ ძალაუფლებისთვის, ასე ვთქვათ, შეუფერებელი იარაღი. ეს იყო ძალიან მძიმე, მათ შორის სისტემურ დანაშაულზე მინდა, ყურადღება გავამახვილო. არასდროს გამჭირვებია და არ მიჭირს, რომ ჩვენი ხელისუფლების პირობებში არსებულ სისტემურ პრობლემებზე მესაუბრა. მათ შორის, მესაუბრა შეცდომებზე და ეს იყო მათ შორის სისტემური დანაშაული. ის, რომ კანონის უზენაესობასთან მიმართებაში ძალთა ბალანსი არ არსებობდა, რადგანაც გარკვეულ ადამიანებს, ადამიანების წრეს და მათ შორის, მეგის ქარდავას ჰქონდათ ეს განუსაზღვრელი ძალაუფლება და ხშირ შემთხვევაში, ამ ძალაუფლების გამოყენება ხდებოდა კანონის ღერძის გადახრით, კანონის უზენაესობის ჩარჩოდან გასვლით. ამიტომ, როცა ადამიანს ასეთი ძალაუფლება ჰქონდა და ცუდად იყენებდა ამ ძალაუფლებას, უნდა იყოს შესაბამისად მართლმსაჯულების, მაგრამ ხაზს ვუსვამ, ობიექტური მართლმსაჯულების წინაშე წარმდგარი. ვინც უნდა იყოს, ყველას აქვს ობიექტური მართლმსაჯულების წინაშე წარდგომის უფლება“, – განაცხადა დეკანოიძემ.

ამასთან, ხატია დეკანოიძის თქმით, ბევრი ადამიანი, ვინც კუდ-ში და სამხედრო პოლიციაში მუშაობდა, დღესაც არის თანამდებობაზე.

„საზარელია, რომ „ქართულმა ოცნებამ“ კიდევ უფრო გაფურჩქნა შიდაძალადობრივი აქტები, მათ შორის კანონია უზენაესობის დარღვევა“, – აღნიშნა ხატია დეკანოიძემ.

უკრაინის სასამართლომ დააკმაყოფილა საქართველოს პროკურატურის შუამდგომლობა თავდაცვის სამინისტროს სამხედრო პოლიციის ყოფილი უფროსის, მეგის ქარდავას ექსტრადირების შესახებ და 17 სექტემბერს საქართველოს იუსტიციის სამინისტროს სპეციალური პენიტენციური სამსახურის თანამშრომლების მიერ უკრაინიდან მისი საქართველოში ეტაპირება განხორციელდა.

პროკურატურაში აცხადებენ, რომ მეგის ქარდავას მიმართ საქართველოში არსებული სისხლის სამართლის 11 საქმიდან ხუთზე გამოტანილია გამამტყუნებელი განაჩენი, ხოლო სისხლის სამართლის ექვსი საქმე იხილება თბილისის საქალაქო სასამართლოში.

კომენტარები
რეკლამა
მოწონება