ჩემი აზრით, პოლარიზაცია არის თავსმოხვეული ტერმინი, რომლის ერთადერთი მიზანია შეიფუთოს რადიკალიზმი პოლიტიკაში, – ამის შესახებ „ქართული ოცნების“ თავმჯდომარემ, ირაკლი კობახიძემ გადაცემა „იმედი LIVE“-ში განაცხადა.
„ნებისმიერი პოლიტიკა, თავისი არსით პოლარიზებული უნდა იყოს. მართალია ჭარბი არაფერი ვარგა, მაგრამ პოლარიზაცია დემოკრატიის ნაწილია. რომ შეხედოთ ევროპულ ქვეყნებს, პოლარიზაცია ყველგან არის. გერმანია, რომელიც არის ერთ-ერთი ტრადიციული დემოკრატიის ქვეყანა, იქაც არიან პარტიები, რომლებიც ერთმანეთს არ აღიარებენ.
ჩვენთან მძაფრად რაც არის ეს არის რადიკალიზმი. როცა რადიკალიზმს უწოდებ პოლარიზაციას, ამით ცდილობ, რომ რადიკალიზმზე პასუხისმგებლობა გადაანაწილო ყველა პოლიტიკურ ძალაზე. სინამდვილეში რა ხდება. ჩვენ ვართ მმართველი პარტია, სუბიექტურად დაინტერესებული ვართ, რომ როცა მოვიგებთ არჩევნებს, 4 წელი მშვიდად ვმართოთ ქვეყანა. ამიტომ ჩვენ ვერავინ დაგვაბრალებს, რომ პოლარიზაციის ინიციატორები ჩვენ ვართ. ყველასთვის ნათელია, რომ ამის ინიციატორი არის ოპოზიციის რადიკალური ნაწილი და ეს ხდება რადიკალიზმით“, – განაცხადა ირაკლი კობახიძემ.