ხელვაჩაურის მუნიციპალიტეტის სოფელ სინდიეთში სახალხო ტრადიციული დღესასწაული „მაჭახლობა – 2022“ გაიმართა. საზეიმო ღონისძიებას ხელვაჩაურის მუნიციპალიტეტის მერი ზაზა დიასამიძე, საკრებულოს თავმჯდომარე თენგიზ ირემაძე, უმაღლესი საბჭოს მაჟორიტარი დეპუტატი ფრიდონ ფუტკარაძე და მოწვეული სტუმრები ესწრებოდნენ.
სტუმრებმა დამსწრე საზოგადოებას „მაჭახლობის“ დღესასასწაული მიულოცეს, ხეობის ტურისტულ მნიშვნელობაზე ისაუბრეს და მოსახლეობას ისტორიული ხეობისთვის უფრო მიმზიდველი ინფრასტრუქტურისა და ახალი ტურისტული ობიექტების შექმნის მიმართულებით მუშაობას დაპირდნენ.
“მაჭახლობაზე” ადგილობრივ მოსახლეობასთან ერთად უცხოელი ტურისტებიც იმყოფებოდნენ.
სახალხო ზეიმი „მაჭახლობა“ 2007 წლიდან მაჭახლის ხეობის სხვადასხვა სოფელში იმართება, წელს ზეიმი სოფელ სინდიეთში გაიმართა.
დღესასწაულის ფარგლებში ღია ცის ქვეშ წარმოდგენილი იყო ყველა სოფლისთვის დამახასიათებელი ეთნოგრაფიული ნიმუშები, გაიმართა კულინარიული ნაწარმის დამზადება – დაგემოვნება. ასევე, მოეწყო სპორტული აქტივობები და სასცენო წარმოდგენები, რომლებიც ხეობისთვის დამახასიათებელ კულტურას, ეთნოგრაფიას და ტრადიციებს ასახავს.
მიმდინარე წელს „საპატიო მაჭახლელი 2022“- ის წოდება მიენიჭათ: როინ მალაყმაძეს, დავით ნაგერვაძეს და მალვინა სირბილაძეს.
„მაჭახლობა-2022“ კონცერტით გაგრძელდა, სადაც მონაწილეობდნენ ადგილობრივი ფოლკლორული და ქორეოგრაფიული ანსამბლები, ადგილობრივმა შემოქმედებითმა ჯგუფებმა, ძველი და ახალი თაობის სახალხო მთქმელებმა, თავიანთი შემოქმედება წარმოადგინეს.
კონცერტი მოწვეული მომღერალის ბაიარ შაჰინის გამოსვლით დასრულდა.