ძნელია მოძებნო სიტყვები იმ გულისტკივილის გადმოსაცემად, რასაც ვაკის პარკში დატრიალებული უბედურების გამო განვიცდი, – ამის შესახებ პრემიერ-მინისტრი ირაკლი ღარიბაშვილი სოციალურ ქსელ “ფეისბუქში“ წერს.
მთავრობის მეთაური გარდაცვლილი მოზარდის ოჯახს თანადგომას უცხადებს.
„ამ უმძიმეს წუთებში, მთელი გულით ვიზიარებ გარდაცვლილი მოზარდის ოჯახის წევრების, ახლობლებისა და მეგობრების მწუხარებას და თანადგომას ვუცხადებ მათ.
გამოძიება უკვე დაწყებულია, დადგინდება ტრაგედიის მიზეზები და მოხდება უმკაცრესი რეაგირება,”– ნათქვამია განცხადებაში.
შეგახსენებთ, ტრაგედია დღეს, ვაკის პარკში დატრიალდა. ორი მოზარდი, რომლებიც ვაკის პარკში მდებარე შადრევანში ბურთის გამოსატანად შევიდნენ, დენმა დაარტყა.
13 წლის გოგონა დენის დარტყმის შედეგად კლინიკაში გარდაიცვალა.
რაც ეხება მეორე დაშავებულ ბიჭს, მისი მდგომარეობა სტაბილურია.