ამ ინტერვიუში კარგად გამოჩნდა მთელი იმ კონფერენციის სულისკვეთება, რომელიც თბილისში ჩატარდა და მკაფიოდ იკითხება ერთი რამ: ზეწოლა იყო საქართველოს ხელისუფლების სხვადასხვა წარმომდგენელზე, რომ როგორმე მომხდარიყო საქართველოს ომში ჩართვა და ეს ზეწოლა დღესაც გრძელდება, – ამის შესახებ მოძრაობა „ხალხის ძალის“ წევრმა, დეპუტატმა სოზარ სუბარმა განაცხადა.
„ეს პირდაპირ ითქვა ინტერვიუში, სადაც არის გამოხატული უკმაყოფილება იმის გამო, რომ საქართველო არ აქტიურობს სანქციების ნაწილში და რა მოხდა, თუ ომი იქნება: კი, ომში საქართველო ვერ გაიმარჯვებს,როგორც ეველინ ფარკასი ამბობს, მაგრამ სამაგიეროდ, ეს ერთჯერადი დამარცხება იქნება და გრძელვადიანში საქართველო რაღაც შედეგებს მიიღებს. ასევე მოყვანილია „კარგი ქცევის“ მაგალითად მოლდოვა და როგორ ცუდად იქცევა საქართველოს ხელისუფლება. მოლდოვა, რომელიც დსთ-ს წევრია და ამბობს, რომ მისთვის მიუღებელია ნატოში გაწევრიანება. მოლდოვა თურმე უნდა იყოს სამაგალითო საქართველოსთვის იმიტომ, რომ მოლდოვის ხელისუფლება დღეს ცდილობს გაატაროს ის პოლიტიკა, რასაც გარედან უკარნახებენ და არა ის, რაც მოლოვისთვის და მოლდოველი ხალხისთვის იყოს კარგი“, – განაცხადა სუბარმა.