IMG.GE IMG.GE

გარდაცვლილი ფეხბურთელის, გიორგი შაქარაშვილის ბიძამ არასრულწლოვნების დღევანდელ სასამართლო სხდომასთან დაკავშირებით განაცხადა, რომ სამართლებრივი ლოგიკის თანახმად, ისინი პატიმრობაში უნდა დარჩნენ, რადგან არსებობს საფრთხე მათი მიმალვის ან მტკიცებულებების განადგურების.

მირიან ნიკოლაძის განცხადებით, ოჯახის მოთხოვნაა, რომ ორ არასრულწლოვანს, რომელიც “ტოიოტას” მარკის ავტომობილის ეპიზოდში ფიგურირებენ, ბრალი მკვლელობის მუხლით წაუყენონ.

“მოლოდინში ვართ, რომ ნებისმიერი სამართლებრივი ლოგიკის თანახმად, ისინი უნდა დარჩნენ ისევ პატიმრობაში. ადვოკატებს ექნებათ შუამდგომლობები ზოგიერთი მტკიცებულების დაუშვებლად ცნობასთან დაკავშირებით. მუხლის დამძიმებასთან დაკავშირებით, რაც შეეხება იმ ორ არასრულწლოვანს, რომელიც ფიგურირებენ “ტოიოტა ქემრის” ეპიზოდში, ეს მოთხოვნა ძალაშია და მათ მიმართ ძალაში იქნება კვლავაც, ვიდრე არ წაეყენებათ ბრალი ძირითად საქმეში,”-განაცხადა მირიან ნიკოლაძემ.

19 წლის ფეხბურთელის გიორგი შაქარაშვილის გარდაცვალების საქმეზე გამოძიება 4 მუხლით მიმდინარეობს: თავისუფლების უკანონოდ აღკვეთის, ძალადობის, ჯგუფური ძალადობის ორგანიზების და ჯგუფურად განხორციელებული განზრახ მკვლელობის. 17 პირს აღკვეთის ღონისძიების სახით პატიმრობა აქვს შეფარდებული. ოჯახმა გიორგი შაქარაშვილის გაუჩინარების შესახებ პოლიციას 19 ივნისს მიმართა. მანამდე ის ნარეკვავის დასახლებაში წვეულებაზე იმყოფებოდა. წვეულების დროს და მის შემდეგ სხვადასხვა პირებს შორის რამდენიმე დაპირისპირება მოხდა. ახალგაზრდა ფეხბურთელი 22 ივნისს მდინარე არაგვში, გარდაცვლილი იპოვეს. იმის მიუხედავად, რომ გიორგი შაქარაშვილის საქმეზე გამოძიება 109-ე, განზრახ ჯგუფურად ჩადენილი მკვლელობის მუხლითაც მიმდინარეობს, ჯერ ეს ბრალი არც ერთი დაკავებულისთვის არ წარუდგენიათ.

კომენტარის დატოვება
IMG.GE
გაზიარება