„ყირიმის პლატფორმის“ მეორე სამიტზე სიტყვით გამოსვლისას ევროპული საბჭოს პრეზიდენტმა, შარლ მიშელმა განაცხადა, რომ ევროკავშირმა არ აღიარა და არ აღიარებს რუსეთის მიერ ყირიმის ნახევარკუნძულის უკანონო ანექსიას.
„ყირიმი უკრაინაა. რუსეთის აგრესია არ დაწყებულა 2022 წლის თებერვალში. ის 2014 წელს ყირიმის უკანონო ანექსიით დაიწყო. ეს მხოლოდ დასაწყისი იყო რუსული აგრესიის, უკანონო ქმედებებისა უკრაინელი ხალხის წინააღმდეგ. ამ ომმა დიდი ტანჯვა გამოიწვია მილიონობით უკრაინელისთვის“, – აღნიშნა ევროპული საბჭოს პრეზიდენტმა.
შარლ მიშელმა ასევე აღნიშნა, რომ თებერვლიდან რუსეთი ყირიმს უკრაინის სხვა რეგიონებში შეჭრის პლაცდარმად იყენებს.
„ჩვენი მხარდაჭერა უპრეცედენტოა. უკრაინას ძლიერ მხარდაჭერას ვუწევთ ჰუმანიტარული, მაკროფინანსური დახმარების სახით, მხარდაჭერას ვუწევთ ლტოლვილებს, უპრეცედენტო სამხედრო დახმარებას და ასევე ვუერთდებით უკრაინის აღდგენის ძალისხმევას. თქვენი მომავალი ევროკავშირთანაა. დიდი ოცნება მაქვს, რომ მეც შევძლებ შემოგიერთდეთ, ბატონო ვოლოდიმირ, ყირიმში მოგზაურობაში. ასევე მოვუწოდებ ყველა ქვეყანას, დაგმოს რუსეთის ნებისმიერი მცდელობა, გავლენა მოახდინოს უკრაინის ტერიტორიულ მთლიანობაზე“, – განაცხადა შარლ მიშელმა.