საქართველოს არსებობის 5000-წლიანი ისტორია აქვს და ამ ისტორიას ვერავინ გადაწერს, – ასე გამოეხმაურა პარლამენტის ვიცე-სპიკერი, „ქართული ოცნების” ერთ-ერთი ლიდერი არჩილ თალაკვაძე რუსეთის უშიშროების საბჭოს მდივნის მოადგილის, დიმიტრი მედვედევის სოციალურ ქსელში გამოქვეყნებულ პოსტს.
თალაკვაძის თქმით, ეს განცხადება და შემდეგ გაკეთებული განმარტებები კიდევ ერთხელ ადასტურებს, თუ რა რთულ ბეწვის ხიდზე უწევს საქართველოს გავლა.
„ვიმყოფებით რთულ რეგიონში, საფრთხეებით და გამოწვევებით სავსე დროში, როცა ყველა მხრიდან საქართველოს მშვიდობას კონკრეტული საფრთხე ემუქრება, მათ შორის რუსეთი აგრძელებს საქართველოს უკანონო ოკუპაციას და ჩვენ ვაგრძელებთ მშვიდობიან ბრძოლას საერთაშორისო პრინციპების დაცვით, რომ შევძლოთ, ჩვენი ტერიტორიული მთლიანობის აღდგენა და გრძელვადიანი უსაფრთხოების დაცვა. ეს არის ჩვენი ხელისუფლების ნომერ პირველი ამოცანა”, – განაცხადა არჩილ თალაკვაძემ.
ერთ-ერთ სოციალურ ქსელში დიმიტრი მედვედევის გვერდზე გაჩნდა პოსტი, რომელშიც საქართველოზეც იყო საუბარი. კერძოდ, პოსტის ავტორი წერდა, რომ „რუსეთის იმპერიის მიერ საქართველოს შეერთებამდე ის საერთოდ არ არსებობდა, ხოლო ჩრდილოეთი და სამხრეთი ოსეთი, აფხაზეთი და საქართველოს დანარჩენი ტერიტორია შეიძლება გაერთიანებული იყოს მხოლოდ რუსეთის ერთიანი სახელმწიფოს შემადგენლობაში“. მოგვიანებით მედვედევის თანაშემწემ განაცხადა, რომ სოცქსელის გვერდი ჰაკერებმა გატეხეს და პოსტი მედვედევს არ ეკუთვნოდა.