გამომდინარე იქიდან, რომ მიხეილ სააკაშვილის სიცოცხლეს საფრთხე ემუქრება ახლა, მთავარ ღირებულებად მისი გადარჩენა ცხადდება, ამიტომ იგი ტოვებს ყველანაირ პოლიტიკას,- ამის შესახებ მიხეილ სააკაშვილის ადვოკატმა ვალერი გელბახიანმა განაცხადა. მისივე თქმით, პოლიტიკიდან წასვლის გადაწყვეტილება ყოფილმა პრეზიდენტმა გუბაზ სანიკიძესაც დაუდასტურა.
„თვითმარქვია არ ვარ, რომ ასეთი სერიოზული შინაარსის განცხადებები ჩემი ნებით გამეკეთებინა. ბუნებრივია იყო საუბარი მიხეილ სააკაშვილის პოლიტიკიდან წასვლაზე. არა თუ საუბარი, არამედ ფორმულირებაც იყო, რომ მისი ჯანმრთელობის მდგომარეობის გამო ხდება ეს. ახლა სასწორზეა მისი სიცოცხლე და ვინაიდან საფრთხე ემუქრება მას, მთავარ ღირებულებად ცხადდება მისი გადარჩენა. აქედან გამომდინარე, იგი ტოვებს ქართულ და ყველანაირ პოლიტიკას. როგორც ჩანს „ნაციონალურ მოძრაობას“ არ აწყობს ამაზე საუბარი, ბოლო-ბოლო ბატონი მიხეილი ადრე თუ გვიან იტყვის თავს სიტყვას.
მას სათქმელი ბევრი აქვს. ახლა უბრალოდ გაკეთდა განცხადება იმიტომ, რომ ყველამ, შინაურმაც და გარეულმაც იცოდეს, რომ მიხეილ სააკაშვილი პოლიტიკას ჩამოშორდა. დავსვი კითხვაც, ვინმეზე ნაწყენი ხომ არ არის ან პრეტენზიები ხომ არ აქვს. ის ამაზე ცალსახად პასუხობს „არას“. ამბობს, რომ პირადი მოტივაციები აქ არ არსებობს. გუბაზ სანიკიძემაც მოინახულა და მასაც იგივე დაუდასტურა. ცხადია, ლიდერი თუ გამოეცლება პარტიას, ელექტორატიც იკარგება ხომ?!. მათი საქმეა, ერთმანეთში მოილაპარაკებენ, მაგრამ მე ვიცი სააკაშვილის პოზიცია, რომ ის არ ცვლის ამ დამოკიდებულებას“,– განაცხადა ვალერი გელბახიანმა.