პრაქტიკულად, ამ წერილმა ფარდა ახადა ყველაფერს – არა მხოლოდ იმას, შედგა თუ არა შეხვედრა კელი დეგნანსა და ბიძინა ივანიშვილს შორის, არამედ ამ წერილის შინაარსში იკითხება, თუ რაზე იყო იქ საუბარი, – ამის შესახებ დამოუკიდებელმა დეპუტატმა, დიმიტრი ხუნდაძემ ყოფილი პრემიერის ბიძინა ივანიშვილის წერილის შეფასებისას განაცხადა.
„ჩნდება დამატებით ერთი კითხვა: თუკი ბიძინა ივანიშვილი დათანხმდებოდა იმას, რომ ქვეყანა ჩართულიყო ომში, მაშინ ის აღარ იქნებოდა ოლიგარქი? შეხვედრის ხანგრძლივობაც მიანიშნებს იმაზე, რომ ეს შეხვედრა და მისი შინაარსი არ იყო მარტივი. ესეც მეტყველებს იმაზე, რომ იყო საუბარი იმ დროისთვის მთავარ საკითხზე, რომელიც ახლაც აქტუალური რჩება. ომის საფრთხეები შემცირებულია, მაგრამ ბოლომდე ამოწურული არაა. ამიტომ საჭიროა საზოგადოების მობილიზება და შეიარაღება სწორი ინფორმაციით, რომ ის სხვა შეიარაღების მსხვერპლი არ გახდეს“, – განაცხადა დიმიტრი ხუნდაძემ.