ევროპარლამენტარ ვიოლა ფონ კრამონის განცხადებით, სამწუხაროა, რომ ოპოზიცია ხელიდან უშვებს მნიშვნელოვან შანსს, რადგან ახლა 12-პუნქტიანი გეგმის შესასრულებლად ყველა პოლიტიკურმა ძალამ, განურჩევლად მათი პოლიტიკური შეხედულებებისა, ერთად უნდა იმუშაოს.
„ვიტყოდი, რომ დასანანია. ჩვენ მოვუწოდეთ ოპოზიციას, რათა მონაწილეობა მიიღონ ამ პროცესში. ჩვენ მათი მხოლოდ წახალისება შეგვიძლია, რათა გამოიყენონ ეს შესაძლებლობა და თუ პროცედურა არ არის სწორი და გამჭვირვალე, ჩვენ შეგვიძლია ყოველთვის გაკრიტიკება, მაგრამ ამ მომენტისთვის, პირველ რიგში, მათ უნდა გამოიყენონ შესაძლებლობა“, – განაცხადა ევროპარლამენტარმა.
ევროპარლამენტარების შვიდკაციანი დელეგაცია საქართველოს გუშინ ეწვია. დელეგაციას ევროპარლამენტის საგარეო ურთიერთობათა კომიტეტის თავმჯდომარე ხელმძღვანელობს. ორდღიანი ვიზიტის ფარგლებში უკვე გაიმართა შეხვედრა პრეზიდენტთან, პარლამენტის თავმჯდომარესთან, საპარლამენტო კომიტეტების თავმჯდომარეებთან, ოპოზიციასთან, მესამე სექტორთან და სახალხო დამცველთან.