საფრანგეთში პროფკავშირები ქვეყნის მასშტაბით გაფიცვისა და საპროტესტო აქციების გამართვას გეგმავენ. ინფორმაციას ფრანგული მედია ავრცელებს.
პროფკავშირებმა გაფიცვაში მონაწილეობისკენ საჯარო სექტორში დასაქმებულ 5,8 მილიონ ადამიანს მოუწოდეს.
მედიის ცნობით, ეს სექტემბრის შემდეგ პროფკავშირების მიერ ორგანიზებული ერთობლივი საპროტესტო მოქმედებების მესამე დღეა.
წინა აქციამ, რომელიც მიმდინარე თვის დასაწყისში გაიმართა, ქუჩებში ასობით ათასი ადამიანი გამოიყვანა. რამდენიმე ქალაქში დემონსტრანტებსა და პოლიციას შორის შეტაკებები მოხდა, სამართალდამცველებმა კი ცრემლსადენი გაზი გამოიყენეს.
პროფკავშირების უკმაყოფილება პრემიერ-მინისტრ სებასტიან ლეკორნუსთან პარასკევს გამართული შეხვედრის შემდეგ კიდევ უფრო გაიზარდა. მოლაპარაკებებმა პროფკავშირების მოთხოვნები ვერ დააკმაყოფილა. ისინი ხელფასების საყოველთაო ზრდას მოითხოვენ მას შემდეგ, რაც გასულ კვირას კერძო სექტორში დასაქმებულებისთვის მინიმალური ხელფასი გაიზარდა.
საფრანგეთის პოლიციის ინფორმაციით, პარიზში აქციაზე 40 000-დან 80 000-მდე ადამიანს ელოდებიან, ქვეყნის მასშტაბით კი დემონსტრანტების რაოდენობა შესაძლოა 220 000-დან 300 000-მდე იყოს.
პარიზში, საზოგადოებრივი უსაფრთხოების მიზნით, დილის 11:00 საათიდან მეტროს რამდენიმე სადგური მგზავრებისთვის დაიხურება. შეზღუდვის მიზეზად ქუჩაში დაგეგმილი დემონსტრაცია სახელდება.
საფრანგეთში საპროტესტო გამოსვლების მიმდინარე ტალღა სექტემბერში დაიწყო. თავდაპირველად აქციებში სკოლის მოსწავლეები ჩაერთნენ, რომლებმაც ათეულობით სკოლა ბლოკადაში მოაქციეს. ისინი სწავლების არასათანადო პირობებს აპროტესტებდნენ, მათ შორის მასწავლებლების ნაკლებობასა და სასწავლო შენობების მძიმე მდგომარეობას.
მოგვიანებით საპროტესტო მოძრაობას სხვადასხვა პროფკავშირი და ე.წ. „ყვითელი ჟილეტების“ მოძრაობის აქტივისტებიც შეუერთდნენ. მათი უკმაყოფილება სხვადასხვა საკითხს უკავშირდება – ინფლაციას, ცხოვრების გაძვირებასა და პოლიციის შესახებ შემოთავაზებულ კანონპროექტს.
