მიმდინარე წლის პირველ 10 თვეში ევროკავშირმა რუსეთის არქტიკული პროექტის, Yamal-ის თხევად ბუნებრივ აირში დაახლოებით €8.7 მილიარდი ($9.6 მლრდ.) გადაიხადა.
სანქციების მონიტორინგის არასამთავრობო ორგანიზაცია Urgewald-ის ინფორმაციით, რომელიც ანალიტიკურ პლატფორმა Kpler-ის მონაცემებს ეყრდნობა, ევროპულმა ბლოკმა ამ რესურსში 2025 წლის სრულ მაჩვენებელზე ერთი მეხუთედით მეტი უკვე დახარჯა.
როგორც ირკვევა, ცალკეულად ოქტომბერში ევროკავშირის ქვეყნებმა 705,591 ტონა Yamal-ის თხევადი გაზი შეისყიდეს. მართალია, სექტემბერთან შედარებით ეს მოცულობა 11%-ით შემცირდა, თუმცა ფასების ზრდის გამო გადახდილი თანხა 2.6%-ით გაიზარდა.
რაც შეეხება იმპორტის გეოგრაფიულ განაწილებას, ოქტომბერში რუსული თხევადი გაზის მთავარი შემსყიდველი საფრანგეთი გახდა. ამ ქვეყანაზე ევროკავშირის მთლიანი შესყიდვების 70% მოვიდა – ფრანგულმა პორტებმა 7 ტვირთი მიიღეს, ესპანეთმა – 2, ხოლო ნიდერლანდებმა – 1.
თუმცა, ბელგიის ზებრიუგეს ტერმინალში, რომელიც ტრადიციულად რუსული თხევადი გაზის ერთ-ერთი წამყვანი მიმღებია, აგვისტოდან ოქტომბრის ჩათვლით არცერთი ტვირთი არ შესულა.
ენერგეტიკისა და სუფთა ჰაერის შემსწავლელი ცენტრის, CREA-ს შეფასებით, მოსალოდნელი აკრძალვის მიუხედავად, ევროპული ბლოკი რუსული თხევადი გაზის მთავარ მყიდველად რჩება და რუსეთის მთლიანი ექსპორტის თითქმის ნახევარს ითვისებს.
ცნობისთვის, რუსული გაზის იმპორტზე ევროკავშირის სრული აკრძალვა ძალაში ორ თვეზე ნაკლებ დროში, იანვარში შევა. ეს გადაწყვეტილება კი რუსულ ენერგორესურსებზე ევროპის დამოკიდებულების დასრულებასა და კრემლის სამხედრო შემოსავლების შემცირებას ისახავს მიზნად.