ათენში ნაგვის ურნასთან, ჩემოდანში ახალგაზრდა ქალის ცხედარი იპოვეს — გარდაცვლილი ბურკინა-ფასოს მოქალაქეა
საბერძნეთის დედაქალაქ ათენში შემზარავი შემთხვევა მოხდა. აგიოს პანტელეიმონასის რაიონში, ნაგვის ურნის გვერდით დატოვებულ ჩემოდანში ახალგაზრდა ქალის ცხედარი აღმოაჩინეს.
შემთხვევა 8 ნოემბერს მოხდა. ჩემოდნიდან მძაფრი სუნი გამვლელმა იგრძნო, რომელმაც პოლიციას შეატყობინა. სამართალდამცველებმა ადგილზე მისვლის შემდეგ ჩემოდანში ადამიანის ცხედარი აღმოაჩინეს.
გარდაცვლილი 24 წლის ქალი აღმოჩნდა, რომელიც ბურკინა-ფასოს მოქალაქეა. მისი იდენტიფიცირება თითის ანაბეჭდებით მოხერხდა. ქალი დაკარგულად 29 ოქტომბერს იყო გამოცხადებული.
პირველადი ინფორმაციით, ცხედარს გარეგნულად აშკარა დაზიანებები არ აღენიშნებოდა. ექსპერტიზის თანახმად, ქალი დაახლოებით 5–7 დღით ადრე იყო გარდაცვლილი. გავრცელებული ცნობებით, მას ფეხები შეკრული ჰქონდა.
სიკვდილის ზუსტი მიზეზი ამ ეტაპზე დადგენილი არ არის. გამოძიება სხვადასხვა ვერსიას განიხილავს და ტოქსიკოლოგიური კვლევების შედეგებს ელოდება.
შემთხვევა დამატებით კითხვებს აჩენს, რადგან ათენში რამდენიმე თვით ადრე კიდევ ერთი ქალის ცხედარი აღმოაჩინეს ჩემოდანში. თუმცა, ამ ორ საქმეს შორის კავშირი ჯერჯერობით დადასტურებული არ არის.
გამოძიება გრძელდება.