28 აგვისტოს საქართველოს პრეზიდენტმა 226 მსჯავრდებული შეიწყალა. 226 მსჯავრდებული მარიამობის დღესასწაულს საკუთარ ოჯახებში შეხვდა. ეს იყო სახელმწიფოს მეთაურის და სახელმწიფოს მხრიდან გადადგმული ჰუმანური აქტი, რომელმაც იმ ადამიანებს, ვინც დანაშაული აღიარა და მოინანია, მისცა შანსი, დაუბრუნდებიან არა მხოლოდ საკუთარ ოჯახებს, არამედ კეთილსინდისიერი ცხოვრების წესს, – განაცხადა ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარემ, რატი იონათამიშვილმა, პარლამენტის პლენარულ სხდომაზე სიტყვით გამოსვლისას.
იონათამიშვილის განცხადებით, შეწყალების აღნიშნული აქტი არის იმ ჰუმანური პოლიტიკის გაგრძელება, რომელსაც „ქართული ოცნების“ ხელისუფლება დღევანდელობაში ახორციელებს.
იონათამიშვილმა ასევე ყურადღება გაამახვილა განსხვავებაზე – წინა და ამჟამინდელი ხელისუფლების პირობებში თუ რა თანხა იხარჯება ყოველთვიურად თითოეულ პატიმარზე.
„შეწყალების ეს აქტი არის იმ ჰუმანური პოლიტიკის გაგრძელება, რომელსაც ჩვენი ხელისუფლება ახორციელებს. შეგახსენებთ, მხოლოდ დაბალანსებული ამნისტიის იმ კანონის საფუძველზე, რომელიც 2024 წელს იქნა მიღებული საქართველოს პარლამენტის მიერ, 1,000-ზე მეტმა მსჯავრდებულმა დატოვა პენიტენციური დაწესებულება და 7,000-ზე მეტ პრობაციონერს შეეხო. თუმცა, მისი საბოლოო ეფექტი, არასაპატიმრო სასჯელის ზომების გამოყენების შესაძლებლობის შექმნაში რეალურად კიდევ უფრო მეტი იყო.
ცხადია, ჩვენ ვერ მივიღებთ კრიტიკას იმ პირებისგან, ვისაც 2012 წელს 24,500 პატიმარი ჰყავდა ციხეებში გამოკეტილი და ერთ პატიმარზე თვეში დამამცირებლად ცოტას – 300 ლარსაც კი არ ხარჯავდა. ცნობისთვის, ეს თანხა ერთ პატიმარზე დღეს თვეში 2,000 ლარამდეა გაზრდილი.“- განაცხადა რატი იონათამიშვილმა.