საქართველოში ევროკავშირის წარმომადგენლობის თანამშრომლობის განყოფილების ხელმძღვანელი სიგრიდ ბრეტელი და რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, ახმეტის მუნიციპალიტეტს ესტუმრნენ.
სიგრიდ ბრეტელმა და მზია გიორგობიანმა ახმეტის მუნიციპალიტეტის მერთან ალექსი ფიცხელაურთან ერთად რეგიონული განვითარების ერთობლივი პროგრამის ფარგლებში სოფ.აწყურის საბავშვო ბაღის მშენებლობის პროცესი მოინახულეს.
აწყურის საბავშვო ბაღი 50-მდე ბავშვისთვის ამოქმედდება და ადგილობრივი მასწავლებლებისთვის 12 ახალ სამუშაო ადგილს შექმნის. ახალი ბაღი აწყურში ადგილობრივ ოჯახებს დაეხმარება, რომ უზრუნველყონ ბავშვების განათლება და მეტი დრო მოახმარონ ეკონომიკურ აქტივობებს.
სტუმრებმა ასევე მოინახულეს ახმეტის მუნიციპალიტეტში მდებარე ციხე-ქალაქი კვეტერა სადაც ევროკავშირისა და რეგიონული განვითარებისა და ინფრასტრუქტურის სამინისტროს ერთობლივი პროგრამის ფარგლებში ხორციელდება 600 მეტრიანი ახალი გზის მონაკვეთის დაგება, ასევე ვიზიტორთა ცენტრის მშენებლობა და ადგილობრივი მოსახლეობისთვის სავაჭრო ჯიხურების მოწყობა. დამატებით მოეწყობა პარკინგი და საკემპინგე ადგილები, ასევე, წყლისა და ელექტროენერგიის წყაროები.
ახალი ინფრასტრუქტურა მიზნად ისახავს ტურიზმის სტიმულირებას და ადგილობრივი მოსახლეობისათვის ახალი შესაძლებლობების შეთავაზებას.