IMG.GE ___________________________________ IMG.GE

„ლეიბორისტული პარტიის“ თავმჯდომარემ, შალვა ნათელაშვილმა გიორგი შაქარაშვილის საქმის კონტექსტში ავთანდილ ბილანიშვილი (კაწრო) და მისი ადვოკატი თამარ აბესაძე გააკრიტიკა და გაიხსენა ერთ-ერთი ძველი საქმე, სადაც აბესაძე მისი პარტიის წევრის, არჩილ ბენიძის ინტერესებს იცავდა. ნათელაშვილის ინფორმაციით, ადვოკატმა მაშინ არჩილ ბენიძის საქმე კუდთან დაალაგა.

თავად არჩილ ბენიძე კი საპრისიპიროს ამტკიცებს. მისი თქმით, ქვეყნის პირველი „ლეიბორისტი“ პირადად ვანო მერაბიშვილთან იყო გარიგებული, რაშიც მან 1,5 მილიონი ლარი აიღო.

სანამ არჩილ ბენიძის მოსაზრებას გაგაცნობთ გაგახსენებთ, რას ედავებოდა გამოძიება „ლეიბორისტული პარტიის“ წევრებს, რომლებიც სისხლის სამართლის პასუხისგებაში მისცეს იმ დანაშაულისთვის, რომლის ორგანიზატორად შალვა ნათელაშვილი ოფიციალურად იყო დასახელებული, თუმცა „ლეიბორისტების“ ლიდერს სამართლებრივად არაფერი შეხებია.

ლაპარაკია 100 ათას დოლარზე, რომელიც, მაშინდელი პროკურატურის მტკიცებით, „ლეიბორისტული პარტიის“ წევრებს ისრაელის მოქალაქემ და ბადრი პატარკაციშვილის ყოფილმა ბიზნეს პარტნიორმა ანატოლი მოტკინმა გადაურიცხა.

ადეიშვილის უწყება ამტკიცებდა, რომ საქმე აქვთ ორგანიზებულ დანაშაულებრივ ჯგუფთან, რომლის ერთი წევრი და „ლეიბორისტული პარტიის“ აქტივისტი არჩილ ბენიძე კონსტიტუციური უსაფრთხოების დეპარტამენტმა 2008 წლის 25 ივლისს დააკავა.

სისხლის სამართლის საქმეში დევს შალვა ნათელაშვილისა და ანატოლი მოტკინის სატელეფონო ჩანაწერი, სადაც მაშინდელი პროკურატურის მტკიცებით, პოლიტიკოსი და ბიზნესმენი ფულის გადარიცხვაზე მინიშნებით ლაპარაკობენ.

კერძოდ, შალვა ნათელაშვილი ანატოლი მოტკინს ეუბნება, რომ ბავშვებისთვის ჰარი პოტერის წიგნები სჭირდება, სულ თხუთმეტი ცალი, მაგრამ იქვე განუმარტავს, რვაზე მეტი არ შეიძლებაო.

სწორედ მოტკინთან სატელეფონო საუბრის შემდეგ ლეიბორისტული პარტიის წევრებმა და, მათ შორის, ბრალდებულმა არჩილ ბენიძემ საქართველოს ბანკში გახსნეს რვა ანგარიში, სადაც მოგვიანებით 15-15 ათასი დოლარი ჩაირიცხა.

საქმის მაშინდელი პროკურორის ირაკლი კობიძის თქმით, არსებობდა საფუძვლიანი ვარაუდი, რომ საქმე გვაქვს ორგანიზებულ დანაშაულებრივ ჯგუფთან, რომელსაც უშუალოდ „ლეიბორისტული პარტიის“ ლიდერი ხელმძღვანელობდა.

ახლა კი ვნახოთ, რას ამბობს დღეს არჩილ ბენიძე, რომლის ადვოკატი ნათელაშვილმა კუდის აგენტად გამოაცხადა.

არჩილ ბენიძე, „ლეიბორისტული პარტიის“ ყოფილი წევრი:

„ჩვენ გაგვასამართლეს დანაშაულზე, რომლის ორგანიზატორად ადეიშვილის პროკურატურა პირდაპირ ასახელებდა შალვა ნათელაშვილს. ჩვენ რომ კუდთან ვყოფილიყავით გარიგებულები, 8 თვე ციხეში არ ვიჯდებოდი და კიდევ 4 წელი ემიგრაციაში. მე ამ ამბის შემდეგ საქართველოში ჩამოსვლის საშუალება არ მეძლეოდა, იტალიამ მომცა პოლიტკური თავშესაფარი. 2012 წელს, როდესაც ხელისუფლება შეიცვალა, სასამართლოს გზით მივაღწიე იმას, რომ გავმართლდი ამ საქმეზე.

ადეიშვილი გვედავებოდა, რომ ვითომ ბადრი პატარკაციშვილის კუთვნილ 15 ათას დოლარს ვათეთრებდი ნათელაშვილის დავალებით.

იმდენად აბსურდული ბრალდება იყო, რომ პროკურორი პირად საუბარში პოლიტიკურ დაკვეთას არც კი უარყოფდა.

მაშინ პროკურორის მოადგილე იყო ნიკა გვარამია.

ამის შემდეგ შალვა ნათელაშვილმა 2008 წლის საპარლამენტო არჩევნების დროს 1,5 მილიონი ლარი აიღო. ეს ვიცი დანამდვილებით. ასევე მერაბიშვილმა საკუთარი კაცი ჩაუსვა საარჩევნო სიაში, მისი ბიძაშვილი იყო მგონი თედორაძე გვარად.

ამ თანხის სანაცვლოდ ნათელაშვილმა აიღო ვალდებულება, რომ პარლამენტში შესვლაზე მისი პარტია ბოიკოტს არ გამოაცხადებდა და სხვა ოპოზიციონერებისგან განსხვავებით მანდატს არ დახევდა. ასეც მოხდა.

მაშინდელმა გაერთიანებულმა ოპოზიციამ პროტესტის ნიშნად უარი თქვა პარლამენტში შესვლაზე და მანდატები დახია, თუმცა ნათელაშვილმა მანდატზე უარი არ თქვა. ის ჩვეულებრივ ირიცხებოდა საქართველოს პარლამენტის წევრად, მხოლოდ სხდომებს არ ესწრებოდა. მისი თანაპარტიელები კი უპრობლემოდ შევიდნენ პარლამენტში.

ციხიდან რომ გამოვედი ვანო მერაბიშვილზე უნდა გაგვეკეთებინა განცხადება და ასე მითხრა – ვანოს თავი გაანებე და რაც გინდა ის ქენიო. შემდეგ წამოვიდა მუქარები და იძულებული გამხადეს ქვეყანა დამეტოვებინა.

ახლა ლეიბორისტების ეზოში  რომ არიან შეკრებილები ნაციონალებთან ერთად, ვიღაცას შეიძლება გაუკვირდა, მაგრამ მე არ გამკვირვებია. რეალურად, ნათელაშვილი ყოველთვის ნაციონალების თამაშს თამაშობდა, რადგან დიდი ფულით ჰყავდათ მოსყდული.

ჩვენი დაჭერა ნათელაშვილსაც აწყობდა თავისი პიარისთვის და ნაციონალებსაც, რომელთაც ერთი მხრივ, პატარკაციშვილი „გააშავეს“ ვითომ არალეგალური ფულის გამო და მეორე მხრივ, მათ ადგილებზე არ აწყობდათ რეალური ოპოზიციური აქტივი“.

წყარო: „პრაიმტაიმი“

კომენტარის დატოვება
IMG.GE
გაზიარება