გამოცემა Financial Times-ი წერს, რომ ევროპას „სასწრაფოდ“ სჭირდება ალტერნატიული გადახდის სისტემა Visa და Mastercard-ის ნაცვლად, რადგან არსებობს შიში, რომ ამერიკული კომპანიების დომინაცია შესაძლოა იარაღად იქცეს იმ შემთხვევაში, თუ ტრანსატლანტიკური ურთიერთობები გაუარესდება.
სტატიაში აღნიშნულია, რომ ევროპული საბანკო სისტემა მნიშვნელოვნად არის დამოკიდებული აშშ-ის გადახდის გიგანტებზე. ევროპული გადახდების ინიციატივის (EPI) ხელმძღვანელმა, მარტინა ვაიმერტმა განაცხადა, რომ ევროპას არ გააჩნია საზღვარგარეთული გადახდის ალტერნატივა.
„ჩვენ ძალიან დამოკიდებულები ვართ საერთაშორისო გადახდის სისტემებზე. დიახ, გვაქვს ეროვნული გადახდის სისტემები, როგორიც არის შიდა გადახდის ბარათის სქემები, მაგრამ არ გაგვაჩნია საზღვრების გადამკვეთი, ერთიანი ევროპული გადახდის სისტემა. თუ ვამბობთ, რომ დამოუკიდებლობა მნიშვნელოვანია და ყველამ ვიცით, რომ ეს დროის საკითხია…. სასწრაფოდ გვჭირდება ზომების მიღება“, – განაცხადა ვაიმერტმა.
გამოცემის ცნობით, ნაღდი ფულის შემცირების ფონზე, ევროპელი ოფიციალური პირები სულ უფრო მეტად შიშობენ, რომ აშშ-ის გადახდის კომპანიების ძალაუფლება შესაძლოა გამოყენებული იყოს ზეწოლის იარაღად, თუ ურთიერთობები სერიოზულად გაუარესდება.
ამ საფრთხეზე საუბრობენ როგორც საბანკო სექტორის წარმომადგენლები, ასევე ევროკავშირის მაღალი რანგის ყოფილი ოფიციალური პირები.