საუდის არაბეთის მემკვიდრე პრინცმა, მოჰამედ ბინ სალმანმა, ირანის პრეზიდენტ მასუდ პეზეშკიანს განუცხადა, რომ ერ-რიადი არ დაუშვებს მისი საჰაერო სივრცის ან ტერიტორიის თეირანის წინააღმდეგ სამხედრო მოქმედებებისთვის გამოყენებას, – ინფორმაციას Reuters-ი ავრცელებს.
გამოცემის ცნობით, პეზეშკიანთან სატელეფონო საუბრისას, მემკვიდრე პრინცმა დაადასტურა თავისი ქვეყნის მხარდაჭერა რეგიონში უსაფრთხოებისა და სტაბილურობის გასაძლიერებლად „ნებისმიერი ძალისხმევის მიმართ, რომელიც უთანხმოებებს დიალოგის გზით მოაგვარებს“.
ამასთან, ირანული მედიის ინფორმაციით, პეზეშკიანმა ბინ სალმანთან საუბარში განაცხადა, რომ თეირანი მიესალმება ნებისმიერ პროცესს, საერთაშორისო სამართლის ფარგლებში, რომელიც ხელს უწყობს ომებისა და კონფლიქტების თავიდან აცილებას.