IMG.GE ___________________________________ IMG.GE

პარლამენტმა „ვაჭრობაში ანტიდემპინგური ღონისძიების შემოღების შესახებ” კანონპროექტი მესამე მოსმენით, 79 ხმით დაამტკიცა.

პროექტის მიღების მიზანია საქართველოს საბაჟო ტერიტორიაზე დემპინგური იმპორტისგან ადგილობრივი ინდუსტრიის დაცვა.

როგორც მთავრობა განმარტავს, ვაჭრობაში ანტიდემპინგური საკანონმდებლო ბაზის არარსებობის პირობებში, შესაძლებელია საქართველოს საბაჟო ტერიტორიაზე ადგილი ჰქონდეს უცხო ქვეყნებიდან პროდუქციის დემპინგური ფასებით იმპორტს. რიგ შემთხვევებში, დემპინგური იმპორტი ადგილობრივი წარმოების განვითარებას აფერხებს და დასაქმებულთა რაოდენობას ამცირებს.

კანონპროექტის თანახმად, პროდუქტის დემპინგური იმპორტისას, სპეციალური ანტიდემპინგური ტარიფის შემოღებას წინ უნდა უძღოდეს შესწავლა, რასაც „კონკურენციის სააგენტო“ განახორციელებს. შესწავლა განხორციელდება საქართველოს საბაჟო ტერიტორიაზე პროდუქტის დემპინგური იმპორტის არსებობის დადგენის, დემპინგის შედეგად ადგილობრივი ინდუსტრიისთვის მიყენებული ზიანის ან ზიანის მიყენების საფრთხის დადგენის და ამ ორს შორის მიზეზშედეგობრივი კავშირის დადგენის მიზნით.

შესწავლის ორგანო („კონკურენციის სააგენტო“) უფლებამოსილი იქნება: ა) ადმინისტრაციული ორგანოებისგან გამოითხოვოს შესწავლის განხორციელებისათვის საჭირო ინფორმაცია (მათ შორის კონფიდენციალური). ბ) დაინტერესებული პირებისაგან და სხვა ფიზიკური და იურიდიული პირებისაგან გამოითხოვოს შესწავლის განხორციელებისათვის საჭირო სრული ინფორმაცია (მათ შორის კონფიდენციალური).

შესწავლის ორგანო შესწავლის შედეგების საფუძველზე, საქართველოს მთავრობას წარუდგენს დასკვნას სპეციალური ანტიდემპინგური ტარიფის შემოღების, გადახედვის ან გაუქმების მიზანშეწონილობის შესახებ. იმ შემთხვევაში, თუ შესწავლის პერიოდში დასტურდება, რომ შესწავლის ობიექტი დემპინგურია და იგი ზიანს აყენებს ან ქმნის ზიანის მიყენების საფრთხეს ადგილობრივი ინდუსტრიისთვის, შესწავლის ორგანო, საქართველოს მთავრობას წარუდგენს წინასწარ დასკვნას, წინასწარი ანტიდემპინგური ღონისძიების შემოღების შესახებ.

ცნობისთვის, დემპინგი ნიშნავს შესწავლის ობიექტის ადგილობრივ ბაზარზე განთავსებას მის ნორმალურ ღირებულებაზე დაბალ ფასად.

კომენტარის დატოვება
IMG.GE
გაზიარება