ნატო აპირებს ამ სამიტთან დაკავშირებით მისი პოლიტიკის ძირეულ გადახედვას, ახალი მიდგომების შემოტანას და ვნახოთ, როგორ იქნება უფრო მეტი კონკრეტიკა მათი მხრიდან, ასევე ურთიერთობა და ახალი თანამშრომლობის ჰორიზონტები საქართველოსთან დაკავშირებით, – ამის შესახებ საპარლამენტო უმრავლესობის წევრმა ირაკლი ქადაგიშვილმა განაცხადა.
„ჩვენი მოლოდინი მაღალია. ის რომ მიიწვიეს პრემიერ-მინისტრი, ნიშნავს იმას, რომ თანამშრომლობა უფრო ინტენსიური იქნება. რა იქნება ამის კონკრეტული ჩარჩოები, სამიტის შემდეგ ვილაპარაკებთ“, – განაცხადა ქადაგიშვილმა.
მთავრობის მეთაურმა ირაკლი ღარიბაშვილმა ნატოს სამიტზე მიწვევის ოფიციალური წერილი იენს სტოლტენბერგისგან ერთი კვირის წინ მიიღო. მიწვევის წერილში ნატოს ოფიციალური პირი ამბობს, რომ მიესალმება საქართველოს პრემიერ-მინისტრს შეხვედრაზე, რომელშიც მონაწილეობას მიიღებენ ნატოს წევრი სახელმწიფოების მეთაურები.