თუკი ამ ავადმყოფურ, ცხელ თავზე მოფიქრებული იდეის განხორციელებას შეეცდება, რასაკვირველია, დაუპირისპირდება სახელმწიფოს ინტერესებს და ამის საწინააღმდეგო შესაბამისი მექანიზმები იმოქმედებს, – განაცხადა საქართველოს პარლამენტის თავმჯდომარის პირველმა მოადგილემ, გიორგი ვოლსკიმ ლევან ხაბეიშვილზე საუბრისას.
იგი გამოეხმაურა ხაბეიშვილის განცხადებას, რომელიც საქართველოში მშვიდობიანი რევოლუციის მოხდენას ეხებოდა.
„მშვიდობიანი შეიძლება იყოს დაკავება, პასუხისგებაში მიცემა; მშვიდობიანი შეიძლება, სასამართლო იყოს და მშვიდობიანი დამხობა არ არსებობს. არსებობს მშვიდობიანი რეაგირება ყველანაირ დანაშაულზე, რომელიც საქართველოს მიმართ იქნება ჩადენილი და თუკი ამ ავადმყოფურ, ცხელ თავზე მოფიქრებულ იდეას, შეეცდება, რომ განახორციელოს, რასაკვირველია, სახელმწიფოს ინტერესებს დაუპირისპირდება და შესაბამისი მექანიზმები იმოქმედებს ამის საწინააღმდეგოდ“, – განაცხადა ვოლსკიმ.
„ნაციონალური მოძრაობის“ პოლიტსაბჭოს თავმჯდომარემ, ლევან ხაბეიშვილმა განაცხადა: „კონსტიტუციის ფარგლებში ჩვენ ვაპირებთ, საქართველოში მოხდეს მშვიდობიანი რევოლუცია, დამხობა, თუ ეს სიტყვა გაშინებთ, არ ვიცი, დიახ, მშვიდობიანი დამხობა“.